அச்சம் தவிர்!

அவ்வ்வ்!!!!

2012-01-02T15:23:00.000+05:30

செல்போன் கடை ஒன்றில், கடை உரிமையாளரும், ஒரு சிறுவனும்..

கடை உரிமையாளர்: ஏன்டா, இந்த வயசுலையே இவ்வளவு ஆட்டம் போடறியே, நீயெல்லாம் பெரியவன் ஆனா???

சிறுவன்: உங்களை மாதிரி ஆயிடுவேனா அண்ணா?

க. உ: ????!!!!!

******

உறவினர் ஒருவர் தனது 12வது படிக்கும் மகனுக்கு, இணைய இணைப்புடன் கம்ப்யூட்டர் வாங்கி தந்துள்ளார்..

அவர்: ஏன் லோகு, இன்டர்நெட்ல தப்பான வெப்சைட்டேல்லாம் வருதுல, அதை..

நான்: அதை கண்ட்ரோல் பண்ணுற மாதிரி சாப்ட்வேர் இருக்குண்ணா..

அவர்: அது இல்ல, அந்த மாதிரி வெப்சைட் பார்த்ததை எப்படி மத்தவங்களுக்கு தெரியாம அழிக்கிறது??

நான்: ????!!!!
*****
BPO ஒன்றில் வேலை செய்யும் நான் எனது விடுமுறை நாட்கள் குறித்து பக்கத்து வீட்டு சிறுவனிடம் பேசி கொண்டிருந்த போது..

சிறுவன்: அப்படினா உங்களுக்கு தீபாவளிக்கு லீவு கிடையாதா?

நான்: ஆமாடா, அமெரிக்க பண்டிகைகளுக்கு மட்டும் தான் லீவு, இந்திய பண்டிகைக்கு கிடையாது.

சிறுவன்: சரி, அமெரிக்கால எப்பண்ணா தீபாவளி?

நான்: ?????!!!

விஜய் - நீயா நானா சர்ச்சை -எனது பார்வை

2010-09-06T19:10:00.002+05:30

விஜய் டிவி - நீயா நானாவில் சொல்லப்பட்ட நடிகர் விஜய் குறித்த கருத்து, சர்ச்சையை கிளப்பி ஓய்ந்திருக்கிறது. அன்றைய நிகழ்ச்சிக்கு சம்பந்தமில்லாமல் விஜய் பற்றிய கருத்து தெரிவிக்கப்பட்டதாக விஜய் ரசிகர்கள் சிலர் எதிர்ப்பு தெரிவித்ததாகவும், பின்னர் விஜய் டிவி மன்னிப்பு செய்தி வெளியிட்டதாகவும் கூறப்படுகிறது.
குறிப்பிட்ட அந்த நிகழ்ச்சியை நான் பார்க்கவில்லை. இருந்தாலும் இதையெல்லாம் கேள்விப்படும் போது எனக்கு இரண்டு கேள்விகள் எழுகின்றன.

1 காசு கொடுத்து படம் பார்க்கும் ஒருவருக்கு, படத்தை பற்றியோ குறிப்பிடப்பட்ட நடிகரைப்பற்றியோ கருத்து கூற உரிமை இல்லையோ?
'ஏன் ஒரே மாதிரி நடிக்கிறீங்க?' என்று முன்னர் ஒரு நிகழ்ச்சியில் கோபிநாத் விஜயிடமே நேரில் கேட்டதாகவும், விஜயும் அதற்கான காரணங்களை விளக்கி ஒரு பதிலும் சொன்னதாக நியாபகம். இப்படி இருக்கையில் இப்பொழுது விஜய் ரசிகர்கள் உணர்ச்சிவசப் படுவது ஏன்?

2 அடுத்தது அன்றைய தலைப்புக்கு சம்பந்தமே இல்லாமல் விஜயை விமர்சித்தது நாகரிகமில்லை என்கிறார்கள். அது தவறென்றால் புதிய கீதை என்ற ( மேற்காண் நடிகர் விஜய் நடித்து 2003 ல் வெளிவந்தது) திரைக்காவியத்தில் 'எவன்டா தல' என்று பேசிய வசனமும், சச்சின் என்ற இன்னொரு காவியத்தில் 'எனக்கு ஷாலினி, ஜெயமாலினி எல்லாம் தேவையில்ல' என்று பேசிய வசனமும், இன்னபிற படங்களில் சம்பந்தமே இல்லாமல் பேசியவைகளும் எந்த நாகரிகத்தில் இடம் பெறும் என்று தெரிவித்தால் நலம்.

மேற்கண்ட வசனங்களுக்கும், நீயா நானாவிற்கும் தொடர்பில்லை என்றாலும், விஜய் ரசிகர்களுக்கு சொல்லிக் கொள்வதென்னவென்றால் 'நீங்கள் விதைத்தீர்கள், நீங்களே அறுவடை செய்கிறீர்கள்' என்பது தான்.

குறுஞ்செய்தி எனும் கொடுமை

2010-02-19T19:30:00.000+05:30

எதுவுமே எலவசமா கெடச்சா என்ன கதியாகுங்கறதுக்கு, SMS சேவை நல்ல உதாரணம். ஆரம்பத்துல ஒரு SMS க்கு ஒரு ருபாய்ன்னு இருந்து, அப்புறம் படிப்படியா குறைஞ்சு, பத்து பைசா, அஞ்சு பைசா, ஒரு பைசான்னு கடைசில ஃபிரீ SMS ன்னு ஆயிடுச்சு. இப்பவெல்லாம் சில நெட்வொர்க்ல நாம SMS அனுப்ப அவங்க காசு தர்ற மாதிரி பிளான் எல்லாம் கூட வந்துருக்காம்.

சீக்கிரமா, மலிவா தகவல்களை பரிமாற SMS ரொம்ப உதவியா இருக்குங்கறது உண்மை தான். இரத்தம் தேவை மாதிரியான அவசர நேரங்கள்ல, SMS உயிரை கூட காக்கும். ஆனா உயிரை எடுக்கற மாதிரி SMS களும் ஏராளம். ஆரம்பத்துல குட் மார்னிங், குட் நைட்ன்னு நார்மலா ஆரம்பிச்சவங்க, அது போரடிச்சு போய் ஆளாளுக்கு தத்துவம் எழுத தொடங்கி, இப்ப செல்லு வச்சுருக்கவன்லா சாக்ரடீஸ்ங்கற மாதிரி எழுத ஆரம்பிச்சுட்டாங்க. எங்காவது அவசரமா போயிகிட்டு இருக்கும் போது SMS வரும். எடுத்துப்பார்த்தா “வாழ்க்கை என்பது வாழைப்பழம் மாதிரி, வாய்ல போட்ட இனிக்கும், கீழே போட்ட வழுக்கும்” னு இருக்கும்.

SMS அனுப்பும் போதுதான், நம்மாளுங்களுக்கு பாசம் பொங்கி வழியும். என் உயிரே நீதான், நட்பின் இலக்கணம் நாம் தான்னு பொங்கி வழிவாங்க. நாளைக்கு தர்றேன்னு வாங்கிட்டு போன பணத்தை தரமாட்டாங்க, ஆனா SMS ல மட்டும் நட்புக்காக உயிரே தருவேன்னு உருகுவாங்க. உயிரெல்லாம் வேண்டா, பணத்தக் கொடுடா ம....ன்னு ரிப்ளை பண்ண தோணும்.

இவங்களுக்கு எங்க இருந்துதான் இந்த ’டே’ எல்லாம் கிடைக்குதோ. Today is Red Rose Day, Smile Day, Hugging Day, Black Dress Day இப்படி எத்தன டே.. போங்கடா டேய்!. இன்னொரு இம்சை என்னன்னா இதுல எதாவது ஒரு நெம்பரை சொல்லு, உனக்கு எப்படிபட்ட பொண்டாட்டி அமையும்ன்னு சொல்றேன்னு ஜோதிட கலைமாமணி மாதிரியான SMS களும். இதுல Reply Must ன்னு எச்சரிக்கை வேற.

இதையெல்லாம் விட “ஜெய் பிரம்மானந்தா நமக” இந்த மெசேஜை பத்து பேருக்கு பார்வேர்ட் பண்ணினா பரீட்சைல படிக்காமயே பாஸ் ஆயிடலாம்ன்னு வர்ர SMS கள். அதையும் நம்பி படிக்காம பார்வேர்ட் பண்ணிகிட்டு இருக்கற பகுத்தறிவாளர்களும் உண்டு. அதை ஸ்டூடண்ட்ஸ்க்கு அனுப்பினா பரவால்ல, பள்ளிக்கூடத்துல ஒதுங்க கூடாதுன்றதுக்காக மழைலயே நனைஞ்சுகிட்டு இருந்த என்னை மாதிரி ஆளுங்களுக்கு ஏன்யா அனுப்பறீங்க?

தமிழ்நாட்டுல அனுப்பப்பட்ட மொத்த SMS யும் பிரிச்சு போட்டு பார்த்தா, பாதிக்கு மேல ஒருத்தர் பேரு இருக்கும். அவருதான் ‘விஜய்’. அவரை நெனச்சாத்தான் ரொம்ப பாவமா இருக்கு. ரொம்ப கலாய்க்கறாங்க. இப்பல்லாம் அவர கலாய்ச்சு வ்ர்ற SMS களை படிக்கறதுக்கு பதிலா, அவரு படத்தையே பார்க்கலாம் போலன்னு தோணுது.

இதுல பாதிப்பேருக்கு மேல தமக்கு வர்றத பார்வேர்ட் பண்ற ஆசாமிகள் தான். பில்லை கட்டுடா நாயேன்னு வந்துருக்கற SMS ஐ கூட படிக்காம பார்வேர்ட் பண்ற ஆசாமிகள் உண்டு.

SMSன்னால ஏற்படற இன்னொரு கொடுமை என்னன்னா, ரொம்ப நாள் கஷ்டப்பட்டு பலபேரு கால்ல விழுந்து ஒரு ஃபிகர் நெம்பர் வாங்கி ’hi' ன்னு அனுப்பிட்டு ஆவலா வெயிட் பண்ணுவோம். கரெக்டா 2 வது நிமிசத்துல மொபைல் ரிங்கும். ஆஹா சிக்கிடிச்சுடா மயிலுன்னு ஓபன் பண்ணி பார்த்தா, “ஒரு சூ ல இருந்து மூனு குரங்கு தப்பிச்சிடுச்சாம்...” னு நம்மை டேமேஜ் பண்ற SMSஐ பங்காளி ஒருத்தன் அனுப்பியிருப்பான். அப்ப வரும் பாருங்க கோபம். நல்ல வேளை நமக்கெல்லாம் நெத்திக்கண் இல்லை.

உபயோகமா அனுப்புற SMSகள், SMS மூலமா உரையாடல் எல்லாம் தப்பே இல்ல. குறுஞ்செய்தி எல்லாம் குமரிகள் அனுப்பும் போதும், குமரிகளுக்கு அனுப்பும் போதும்தான் குதூகலமா இருக்கும். நேரங்கெட்ட நேரத்துல, மொக்கையா வர்ர குறுஞ்செய்திகள் கடுப்பை தான் உண்டாக்கும். அதனால தத்துவஞானிகளெல்லாம் போயி புள்ள குட்டிங்கள படிக்க வையுங்க. ஏன்னா, “வாழ்க்கை என்பது வாழக்கா பஜ்ஜி மாதிரி...”

அவள் பெயர் திவ்யா!

2010-02-18T16:20:00.000+05:30

“அதெல்லாம் உனக்கெதுக்குடா?”

“சும்மா சொல்லுடா, தெரிஞ்சுக்கத்தான்..”

“உள்ளூர்லையே இருக்கு”

“உள்ளூர் வேண்டாம் பிரச்சனை, பக்கத்து டவுன்ல எதுனா இருக்கா”

“அதுக்கென்ன பஞ்சமா, இரு அட்ரஸ் தர்றேன்,

பாலு சொன்னான்னு சொல்லு, ஸ்பெசல் கவனிப்பு இருக்கும்.”

“ டேய் பாதுகாப்பு எல்லாம்?”

“அதெல்லாம் அவங்க பாத்துக்குவாங்க நீ பணத்த ரெடி பண்ணு”

********

“ வா தம்பி! என்ன வேணும்?”

“ பாலுதான் இந்த அட்ரஸ் கொடுத்தான்.”

“ யாரு ஆட்டோ டிரைவரா?”

“ ஆமா..”

“ சரி உள்ள வா, எது வேணும்னு பாரு..”

“பரவால்ல, ஏதாவது ஒன்னு”

“ நீ போடி, ஏந்தம்பி இவ்ளோ வெக்கப்படற? ஆயிர ரூவா கொடு”

“ இ... இந்தாங்க”

**********

“இருயா.. ஏன் இவ்ளோ அவசரப்படற, இங்க தான இருக்கேன், டிரஸ்ஸை கிழிச்சுடாதே”

“ஸாரிங்க ”

“பர்ஸ்ட் டைமா? ”

“ஆ.. ஆமாங்க”

“சரி, டிப்ஸ் 100 ருபா கொடு”

“போகும் போது தர்றேன், உங்க பேர் என்ன?”

“என் பேரா, திவ்யா, உன் பேர் என்ன?”

“ ..................”

“யோவ் இருயா, ஏன் போற”

“என்னாச்சு தம்பி, ஏன் போற”

********

“டேய் அதெல்லாம் பொய் பேரா இருக்கும்டா, அவளுக எப்பவுமே நெஜ பேரெல்லாம் சொல்ல மாட்டாளுக”

“பொய்யோ, நெசமோ.. அவ சொன்னது, சின்ன வயசுல தொலைஞ்சு போன என் தங்கச்சி பேருடா.. அப்புறம் எப்படி?”

“போடா வெளக்கெண்ணை, உன்னையெல்லாம்...”

கடவுளும், குழந்தையும்

2010-02-15T12:39:00.002+05:30

சாமி முன்
படையலை வைத்ததும்
பந்திக்கு சென்றனர் பெரியவர்கள்.

சாமி இன்னும்
சாப்பிடலையேன்னு
பார்த்துக்கொண்டு நின்றது
குழந்தை.

**********

எல்லோரும் நல்லாயிருக்க
வேண்ட சொல்லி
கற்று கொடுத்தாள் தாய்.
கடவுளுக்கும் சேர்த்து
வேண்டிக்கொண்டது
குழந்தை.

***********

குழந்தையாய் இருக்க
பிரியப்பட்டே
மீண்டும் மீண்டும்
பிறக்கும் கடவுள்,
வேண்டா வெறுப்பாய்
வளர்ந்து தொலைக்கிறார்.

**************

இரவு முழுதும்
ஒன்றாய் விளையாடுகிறார்கள்
கடவுளும் குழந்தையும்;

காலையில்
குழந்தை கற்கவும்,
கடவுள் காக்கவும் செல்கிறார்கள்
விருப்பமில்லாமல்.

**************

பூச்சாண்டிக்கு பயந்த தாய்

2010-01-28T14:41:00.004+05:30

ஒவ்வொரு குறும்பிலும்,
தன் தாய்க்கு
அவளது பால்யத்தை
நினைவூட்டுகிறது
குழந்தை.

****

கனவில் விளையாடும்
தன் தேவதை தோழிகளை
பிரிய மனமில்லாமல்,
தினமும் காலையில்
அழுகையோடு விழிக்கிறது குழந்தை!

****

திட்டிய அப்பாவை,
ரெட் ரேஞ்சர்சிடம்
சொல்லி விடலாமென
விசும்பும் தாயை
தேற்றுகிறது குழந்தை!

****

"பூச்சாண்டியிடம்
பிடித்து கொடுத்துடுவேன்"என்று
மிரட்டினாள் தாய்.

"கொடுத்துக்கோ!
எனக்கொன்னும் பயமில்லை"
என்றது குழந்தை!

அடுத்து
என்ன சொல்லி
மிரட்டுவது என தெரியாமல்
விழிக்கிறாள்,
தன் பால்யத்தில்
பூச்சாண்டிக்கு பயந்த தாய்!

****
பொம்மைகளின் மொழியில்
புலமையோடு பிறக்கும் குழந்தை,
புதுமொழி கற்கையில்
இழக்குது புலமை.

குடியரசை போற்றுவோம்!!!

2010-01-26T12:09:00.000+05:30

ஐந்தாண்டுக்கொரு முறையேனும்,
கும்பிட்ட கரங்களோடு தலைவர்களும்;
வாங்கிய கடனெல்லாம் வட்டியோடு தள்ளுபடியும்;
ஜனவரியில் பிரிதொரு விடுமுறையும்,
அதில் சிறப்பு நிகழ்ச்சிகளும், திரைப்படமும்;
ஓட்டுக்கு ஐந்நூறும், ஓசியில் பிரியாணியும்;
இலவச டிவியும், இன்ன பிற சலுகைகளும்
குடியரசு இல்லாமல் சாத்தியமில்லை
குடியரசை போற்றுவோம்!!!

பாப்பாத்திக்குருவி

2010-01-22T16:47:00.000+05:30

தோட்டத்து நாவல் மரத்துக்கு

தினமும் வரும் ஒரு குருவி;

கழுத்தோரம் கருப்பு நிறத்தோடு

கீச்சொலி எழுப்பும் செங்குருவி;

பெயர் தெரியா அப்பறவைக்கு,

நாங்களிட்ட பேர் பாப்பாத்திக்குருவி;
அதிகாலை கனவுகளிலும்,
சாயங்கால கதைகளிலும்
தவறாமல் இருந்தது பாப்பாத்தி;
வாத்தியார் வராத வகுப்புகளிலும்
பாப்பாத்தியே பேச்சானது;
நாவல் பழம் பொறுக்கையில்
நாங்களும் கீச்சென கத்திக்கொண்டோம்;
அதிசயமாய் உதிர்ந்த அதன் செவ்விறகு
ஐந்தாம் வகுப்பு புத்தகத்தில் பொக்கிஷமாய்..

பால்யம் தொலைத்து, சுயம் மறந்து,
பணம் தேடி திரிந்த, ஈரேழு வருடத்தில்
நாவல் மரத்தை பலியிட்டு,
அதன் கல்லறையாய் நிற்கிறது
அறுநூறு சதுரடியில் கனவு இல்லம்.
அழைப்பு மணி சத்தத்தில்
வாழ்கிறது பாப்பாத்திக்குருவி.

தசாவதாரங்கள்

2010-01-21T16:02:00.001+05:30

கலாச்சாரங்கள் இணையும்
கலைப்பயணமாய், பேருந்து ஒன்றில்
இன்ப சுற்றுலா சென்றன
தசாவதார பாத்திரங்கள்.

மேல்நாடு வாழும் மகன் ரோஸ்மில்க்
அனுப்புவானென அரற்றிவந்தார் பாட்டி;
புஜபலம் காட்டி, கட்டி புரண்டனர்
பிளட்சரும், நரஹாசியும்;

தன் இருக்கை தனக்கே சொந்தமென,
அராஜகம் செய்தார் அவதார்சிங்;
தனக்கென தனியிருக்கை வேண்டி
ஆர்ப்பாட்டம் செய்தார் பல்ராம் நாயுடு;

ஆடு புலி ஆட்டம் ஆடி வந்தனர்
ரங்கராஜன் நம்பியும், பூவராகனும்;
கோவிந்தும், கலிஃபுல்லாவும் குனிந்திருக்க
லாவகமாய் பச்சக்குதிர தாண்டினார் புஷ்;

இப்படியாய் ஆடிக்களைத்து, அடுத்தவர்
தோளிலும் மடியிளுமாய் கண்ணயர்ந்தனர் சிலர்;
குரோதம் குறைந்து, அணைத்த வாக்கில்
தூங்கினர் பிளட்சரும் நரஹாசியும்;

அருகருகே அமர்ந்த போதும்
கடைசிவரை தூங்கவுமில்லை,
ஏனோ தோள் சாயவுமில்லை
ரங்கராஜனும், பூவராகனும்.

நெடுஞ்சாலை கடக்கும் எறும்புகள்

2010-01-20T15:09:00.003+05:30

எட்ட முடியா எல்லைகள் தேடி
தொலைவுகள் கடக்கும் பயணம்;
நிச்சயமாய் இன்றே இல்லையெனினும்
நிதர்சனமாய் உடன்வரும் மரணம்.

அக்கரை சேர்வது சுலபமில்லை
ஆனாலும் ஆசைகளுக்கு அளவில்லை;
முடிவில்லா பந்தயத்தில்
முந்தி செல்பவர்கள் முதலில் செல்வதில்லை.

தேடலோன்றே நோக்கம், அதில்
ஊடலும், கூடலும் சொச்சம்;
ஊன் தேடி பயணம், அதில்
உயிர் என்பது துச்சம்.

அர்த்தமற்ற பயணத்தில்
அற்பமாய் மரணிக்கிறோம்;
நிலையற்ற வாழ்க்கை ஓட்டத்தில்,
நெடுஞ்சாலை கடக்கும் எறும்புகள்தாம் நாமும்.

அன்பென்று கொட்டு முரசே!

2009-12-30T15:45:00.001+05:30

தெய்வம் பலபல சொல்லிப் - பகைத்
தீயை வளர்ப்பவர் மூடர்;
உய்வ தனைத்திலும் ஒன்றாய் - எங்கும்
ஓர்பொருளானது தெய்வம்.

தீயினைக் கும்பிடும் பார்ப்பார், - நித்தம்
திக்கை வணங்கும் துருக்கர்,
கோவிற் சிலுவையின் முன்னே - நின்று
கும்பிடும் யேசு மதத்தார்.

யாரும் பணிந்திடும் தெய்வம் - பொருள்
யாவினும் நின்றிடும் தெய்வம்,
பாருக்குள்ளே தெய்வம் ஒன்று; - இதில்
பற்பல சண்டைகள் வேண்டாம்.

வெள்ளை நிறத்தொரு பூனை - எங்கள்
வீட்டில் வளருது கண்டீர்;
பிள்ளைகள் பெற்றதப் பூனை, - அவை
பேருக் கொருநிற மாகும்.

சாம்பல் நிறமொரு குட்டி - கருஞ்
சாந்து நிறமொரு குட்டி,
பாம்பு நிறமொரு குட்டி - வெள்ளைப்
பாலின் நிறமொரு குட்டி.

எந்த நிறமிருந்தாலும் - அவை
யாவும் ஒரேதர மன்றோ?
இந்த நிறம்சிறி தென்றும் - இஃது
ஏற்ற மென்றும் சொல்லலாமோ?

வண்ணங்கள் வேற்றுமைப் பட்டால் - அதில்
மானுடர் வேற்றுமை யில்லை;
எண்ணங்கள் செய்கைக ளெல்லாம் - இங்கு
யாவர்க்கும் ஒன்றெனல் காணீர்.

நிகரென்று கொட்டு முரசே! - இந்த
நீணிலம் வாழ்பவ ரெல்லாம்;
தகரென்று கொட்டு முரசே - பொய்ம்மைச்
சாதி வகுப்பினை யெல்லாம்.

அன்பென்று கொட்டு முரசே! - அதில்
ஆக்கமுண் டாமென்று கொட்டு;
துன்பங்கள் யாவுமே போகும் - வெறுஞ்
சூதுப் பிரிவுகள் போனால்.

அன்பென்று கொட்டு முரசே! - மக்கள்
அத்தனைப் பேரும் நிகராம்.
இன்பங்கள் யாவும் பெருகும் - இங்கு
யாவரும் ஒன்றென்று கொண்டால்.

உடன்பிறந் தார்களைப் போலே - இவ்
வுலகில் மனிதரெல் லாரும்;
இடம்பெரி துண்டுவை யத்தில் - இதில்
ஏதுக்குச் சண்டைகள் செய்வீர்?

- மகாகவி பாரதியார்..

***********

ஊரெல்லாம் மழையாச்சு..

2009-11-07T12:51:00.001+05:30

ஆயிரம் கோடி நிவாரணம் கேட்டு
அவசர தந்தி அடித்தார் முதல்வர்..

முதல் கட்டமாய்
முந்நூறு கோடி கொடுத்தார் பிரதமர்..

பத்தவே பத்தாது
பார்த்து செய்யுங்களென மீண்டுமொரு மடல்..

ஆளுங்கட்சிக்கு திறனில்லை என
ஏசியது எதிர்கட்சி..

ஹெலிகாப்டரில் பார்வையிட்டு
ஏகத்துக்கும் வருந்தின கட்சித்தலைமைகள்.

வெள்ள நிவாரண வேட்டி, சேலை வாங்கப்போய்
கூட்ட நெரிசலில் செத்துப்போனான் கபாலி..

பொழப்பு பார்க்க கடலுக்கு போய்
பத்து நாள் ஆயிடுச்சு..

மீதமிருக்கும் ரெண்டு படி அரிசியில்
ரெண்டு நாள் தாக்கு புடிக்கலாம்..

அதுக்குள்ள மழை நிக்க,
ஆண்டவனை வேண்டிக்கிறேன்..

**********

நெல்லு போட்டு இருந்தா
ஏக்கருக்கு ஆயிரமுன்னு
அரசாங்கம் கொடுக்குதாம்..
ரேடியோவுல சொன்னாங்க..

ரெண்டு ஏக்கருக்கு
ரெண்டாயிரம் வரும்னு போனதுல
எறநூறை புடுச்சுட்டு கொடுத்தாரு
எங்கூரு தாசில்தாரு..

பியூனுக்கு பத்துருவா போக,
மீதமிருந்த பணத்தையெல்லாம்
வழியிலேயே புடிங்கிட்டான் வட்டிக்காரன்..
வெத நெல்லு வாங்கிய கடனுங்க அது..

ஊட்டுக்கு போனா
பிஸ்கோத்து
வாங்கியாந்தியான்னு கேப்பானுங்க
என் மக வயித்து பேரன்..

தப்பி பேய்ஞ்ச
பருவ மழைக்கு
எப்படிங்க தெரியும்
ஏழை விவசாயின் பசி...

அடுத்த தெருவுல யாரோ
அஞ்சு வட்டிக்கு
பணம் தர்றாங்களாம்
அவரை போய் பாத்துட்டு வர்றேங்க..

தீபாவளி... நல்லா கேக்கராய்ங்க டீட்டெய்லு...

2009-11-06T14:07:00.000+05:30

எப்படித்தான் இப்படியெல்லாம் தொடர்பதிவு ஆரம்பிக்கறாங்கன்னு தெரியல.. எந்த லாட்ஜ் ல ரூம் போட்டு யோசிக்கறீங்க மக்கா.. ஏற்கனவே அண்ணன் அரவிந்த் சொன்ன ரெண்டு தொடர்பதிவை எழுதலை.. (காரணம்: என்ன எழுதறதுன்னு தெரியலை.. ).. இப்போ அன்பு நண்பர் அன்பு, அன்போட கூப்பிடு இருக்கார்.. இதையாவது எழுதலாமேன்னு நானும்...

1)உங்க‌ளைப் ப‌ற்றி சிறு குறிப்பு ?
நம்மளை பத்தி சொல்லனும்னா சிறு குறிப்பு எல்லாம் பத்தாது, பெரும் காவியம் தான் எழுதனும்.. இருந்தாலும் சுருக்கி சொல்றேன், கவனமா கேட்டுக்கங்க.. ஸ்டூடெண்ட்ஸ் எல்லாம் நோட்ஸ் எடுத்துக்கங்க..

"கன்னி பெண்கள் நெஞ்சுக்குள் கையெழுத்து போட்டவன்..
பத்து பேர்கள் மத்தியில் பளிச்சென்று உள்ளவன்...
அழுக்கு சட்டை போட்டாலும் அழகாய் தெரியும் ஆணழகன்..
பெண்கள் பின்னால் சுற்றாமல் பெண்ணே சுற்றும் பேரழகன்.... "

போதுமா... இன்னும் கொஞ்சம் சொல்லவா..

2)தீபாவ‌ளி என்ற‌வுட‌ன் உங்கள் நினைவிற்கு வ‌ரும் (ம‌ற‌க்க‌ முடியாத‌) ஒரு ச‌ம்ப‌வ‌ம்?
அந்த படத்தில் நடித்த 'பாவனா'...

தீபாவளி பண்டிகை என்றால் மறக்க முடியாத சம்பவம்லா எதுவும் இல்ல..எல்லாமே சந்தோசம் தான்.. எதை குறிப்பிட்டு சொல்வதென்று தெரியலை..

3)2009 தீபாவ‌ளிக்கு எந்த‌ ஊரில் இருக்கிறீர்க‌ள்/இருந்தீர்க‌ள்?
15 ந்தேதி சேலத்துல மாநாடு, 16ந்தேதி ஊட்டில ஊர்வலம், 17ந்தேதி நா எங்க இருந்தேன்னு எனக்கே தெரியல..

ம்ம்ம்.. வீட்ல தான் இருந்தேன், எந்த ஊர்னா கோவை மாவட்டம், சூலூர் வட்டம், கிட்டம்பாளையத்துல.. கதவு எண் 29/26B..

4)த‌ற்போது இருக்கும் ஊரில் கொண்டாடும் தீபாவ‌ளி ப‌ற்றி ஒருசில‌ வ‌ரிக‌ள்?
எப்பவும் அதே ஊர்லதான், குடும்பத்தோடும் நண்பர்களோடும்.. முந்தைய வருடம் வரை நிறைய பட்டாசு, கொஞ்சம் கிரிக்கெட், கொஞ்சம் டிவி, ஒரு சினிமா என்று இருக்கும்.. இம்முறை பட்டாசு மட்டும் இல்லை..

5)புத்தாடை எங்கு வாங்கினீர்கள் ? அல்லது தைத்தீர்க‌ளா?

வாங்கியது தான், திருப்பூரில்.... (கடை பேரு, பில் நெம்பர், சட்டை கலரு எல்லாம் சொல்லனுமா.. )

6)உங்கள் வீட்டில் என்ன‌ ப‌ல‌கார‌ம் செய்தீர்க‌ள் ? அல்ல‌து வாங்கினீர்க‌ள்?
வடை, பாயாசம் - அம்மா செய்தது ..
மைசூர் பாகு - நெல்லை லாலா ஸ்வீட்ஸ், திருப்பூரில் வாங்கியது..

7)உறவினர்களுக்கும், நண்பர்களுக்கும் எவ்வாறு வாழ்த்துக்களைத் தெரிவிக்கிறீர்கள். (உ.ம். மின்னஞ்சல், தொலைபேசி, வாழ்த்து அட்டை)?
குறுஞ்செய்தி சிலருக்கு, தொலைபேசியில் பேசும் போது சிலருக்கு, நேரில் சிலருக்கு..

8)தீபாவ‌ளி அன்று வெளியில் சுற்றுவீர்க‌ளா ? அல்ல‌து தொலைக்காட்சி நிக‌ழ்ச்சிக‌ளில் உங்க‌ளைத் தொலைத்துவிடுவீர்க‌ளா?
தொலைக்காட்சி நிகழ்ச்சி கொஞ்சம், வெளியில் கிரிக்கெட், சினிமா என்று கொஞ்சம்.. வீட்டில் நண்பர்கள், குடும்பத்தோடு அமர்ந்து சந்தோசமாக பேசி, சிரித்து, கலாய்த்து மகிழ்ந்தோம்..

9)இந்த‌ இனிய‌ நாளில் யாருக்கேனும் ஏதேனும் உத‌வி செய்வீர்கள் எனில், அதைப் ப‌ற்றி ஒருசில‌ வ‌ரிக‌ள்?
தீபாவளி அன்று என்று குறிப்பிட்டு செய்வதில்லை.. இயலும் போது செய்வதுண்டு..
ஒரு காலத்துல பட்டாசு பாலு கணக்கா பட்டாசோடு திரிஞ்ச பட்டாசு பிரியன் நான். இம்முறை பட்டாசு வெடிக்காமல் சுற்றுசூழலுக்கும், உங்களுக்கும், எனக்கும் பெரிய உதவி செய்தேன்..
நாலு பேருக்கு நல்லதுன்னா எதுவும் தப்பில்ல...

10)நீங்க‌ள் அழைக்க‌விருக்கும் நால்வ‌ர், அவர்களின் வ‌லைத்த‌ள‌ங்க‌ள்?
"போதும்.. இத்தோட நிறுத்திக்கிவோம்"ன்னு நான் சொல்றேன்..

"இன்னும் ஆரம்பிக்கவே இல்ல, அதுக்குள்ளே எப்படி நிறுத்தறதுன்னு" யாராவது நெனச்சீங்கன்னா நீங்களே வாண்டேடா எழுதுங்க.. தப்பில்ல..

தப்பில்லா தப்பு

2009-11-03T15:18:00.001+05:30

தப்பினால் நேரும்
தப்பிலிருந்து தப்பிக்க,
தப்பே வேண்டாமென்றிருந்தேன்.

தப்பிப்போய் மீண்டும்
தப்பில்லா தப்பை செய்ய விளைகையில்,

தப்பு தப்பி,
தப்பு நேர்ந்தது.

தப்பின் சுகம் போய்,
தப்பு
தப்பியதன் கோபமே
தங்கியது.

மீண்டும்
தப்பு தப்பியதால்
மீதமிருந்த
தப்புக்கள் தப்பின..

இந்த வாரம் இப்படித்தான் ...

2009-10-25T12:40:00.006+05:30

பிரபல பதிவர் கார்க்கி அவர்களுக்கும், எனக்கும் கருத்து வேறுபாடு இருப்பது எங்களை அறிந்த சிலருக்கு தெரியும். இந்நிலையில் எனது முந்தைய பதிவு அவரை தாக்கி எழுதபட்டிருப்பதாக சிலர் அவரிடம் கூறியதாக அவர் மூலமே அறிந்தேன். அது முற்றிலும் தவறானது. எழுத்தாற்றலும், பதிவுலகில் மிகுந்த செல்வாக்கும் கொண்டிருக்கும் அவரை கிண்டல் செய்ய நான் எப்போதும் நினைத்ததில்லை. அப்படி யாராவது நினைத்தால் அது அவர்களது மனப்பிராந்தியே.

************

Windows XP பாடாய் படுத்துகிறது. இந்த வாரம் மட்டும் திரும்ப திரும்ப OS இன்ஸ்டால் செய்ய நேரிட்டது. உபுண்டு லினக்ஸ் பயன்படுத்த எளிமையாக இருந்த போதும், பழகும் வரை சிரமமாக இருக்கிறது. கூடிய விரைவில் விண்டோசை முற்றிலும் கைகழுவி விடுவேன்.
லினக்ஸ் முற்றிலும் இலவசமாக அதன் அதிகாரபூர்வ தளத்திலேயே கிடைக்கிறது.

*********

தனியார் டி.டி.எச் சேவை நிறுவனங்கள் ஒன்றுக்கொன்று சளைக்காமல் கொள்ளை அடிக்கின்றன. நான் பயன்படுத்தும் ரிலையன்சின் 'பிக் டிவி' யில் தமிழ் சேனல்களுக்கு மட்டுமே மாதம் 130 பிடுங்குகிறார்கள். அது தவிர Star Cricket க்கு 28 ரூபாயும், Neo Cricket க்கு மாதம் 40 ரூபாயும் கேட்கிறார்கள். நல்ல வேளையாக தூர்தர்சனிலேயே மேட்ச் ஒளிபரப்பாவதால் பணம் மிச்சம்.

*******

கடந்த வாரங்களில் எங்கள் பகுதியில் கணிசமான விபத்துக்களும், உயிரிழப்புகளும் ஏற்பட்டது. அதை பற்றி நண்பர் ஒருவரிடம் பேசிக்கொண்டிருந்த போது, இங்கு மட்டுமல்ல உலகம் முழுவதுமே இந்த மாதத்தில் பூகம்பம், படகு விபத்து, விமான விபத்து, தீவிரவாதம் ஆகியவற்றால் பலர் இறந்ததை சுட்டிக்காட்டி இதற்கெல்லாம் காரணம் சனி பெயர்ச்சி தான் என்றும், சனி தான் சக்தியுள்ள கிரகம் என்றும் சொன்னார்..

சனி பகவானுக்கே வெளிச்சம்.

*******

டுவிட்டர் பயன்படுத்துவது நன்றாகத்தான் இருக்கிறது. ஆரம்பத்தில் போர் அடித்தாலும் கணிசமான பின் தொடர்பவர்கள் (Followers) வந்த பின் டுவிட்டது மிக சுவாரஸ்யமாக இருக்கிறது. பொதுவாக மாலை நேரங்களில் தான் டுவிட்டர் களை கட்டுகிறது.
என்னோடு டுவிட்ட www.twitter.com/acchamthavir

*******

சன் மியுசிக் சேனலில் இரவு 11 மணிக்கு மேல் ஒளிபரப்பாகும் "நினைத்தாலே இனிக்கும்" நிகழ்ச்சி இனிமை. காதிற்கினிய பழைய பாடல்காட்சிகளை பார்க்க / கேட்க முடிகிறது. நிகழ்ச்சி தொகுத்து வழங்குபவரின் தமிழும் ரசிக்க வைக்கிறது.

*******

ரசித்து சிரிக்க ஒரு அட்டகாசமான காமெடி.. (எவனோ சொந்த காரன் சோத்துக்கு வந்துட்டாண்டா.. )

'ஆப் ஃபாயில்' ஆறுமுகம் - 25

2009-10-24T11:08:00.006+05:30

டிஸ்கி : எந்த வித உள்நோக்கமும் இல்லாமல் 'ஆனந்த விகடன்' வார இதழில் வரும் பிரபலங்கள் 25 பகுதியை தழுவி நகைச்சுவைக்காக எழுதப்பட்டது.

எங்க ஏரியாவில் 'ஆப்பாயில்' ஆறுமுகத்தை தெரியாதவர்கள் யாரும் இருக்க முடியாது. வேலை எதுவும் இல்லாமல் வெட்டியாக இருக்கும் ஆறுமுகம் ஒருமுறை குடித்து விட்டு நடு ரோட்டில் ஆப்பாயில் போட்டதால் அவருக்கு இந்த பெயர். சுதந்திர பறவையான அவரை பற்றிய துணுக்கள் இங்கே.

சமீப காலமாக தினமும் இரவு ஏதாவது ஒரு ராங் நம்பருக்கு போன் பண்ணி பிகர் கிடைத்தால் கடலை போடுவதை வழக்கமாக கொண்டிருக்கிறார்.
இடம், பொருள், வயசு, சைசு என எதையும் பார்க்காமல் கடலை போடுவது இவரது வழக்கம். போன வாரம் துணிக்கடைக்கு போயிருந்த போது அங்கிருந்த பொம்மையிடம் கூட ஒரு மணி நேரம் பேசியது ஹைலைட்.
நமீதாவை மட்டுமே தலைவி என்றழைப்பார், ஷகிலாவை ரசித்த போதும் நமீதா அளவுக்கு வராதுடா என்பது இவர் கருத்து. இப்போது புவனேஸ்வரி மீதும் ஒரு கண் உண்டு.
நீலமும், பச்சையும் பிடித்த கலர்கள்.. நீலப்படம் பார்ப்பதும், பச்சை பச்சையாய் பேசுவதும் தான் காரணம் என்று சொல்லுவார்.
இவர் ஒரு கிரிக்கெட் பைத்தியம். கிரிக்கெட்டை பற்றி பேசுவது ரொம்ப புடிக்கும். மேட்ச் நடக்கும் போது யாருக்காவது போன் பண்ணி சச்சின் எத்தனை கோல் என்று கேட்டு கொண்டிருப்பார்.
இது தவிர பச்ச குதிர தாண்டுதல், கோலி குண்டு என இன்னும் சில தேசிய விளையாட்டுகளிலும் ஆர்வம் உண்டு.
எப்பவாவது மூடு சரியில்லை என்றால் மட்டும் தம்மடிப்பார், தம்மடிக்கும் போது மட்டும், பான்பராக் போடுவார், பான்பராக் போட்டால் மட்டும் லைட்டா தண்ணி அடிப்பார், போதையில் இருக்கும் போது மட்டும்..... மத்தபடி கெட்ட பழக்கம் எதுவும் இல்லை.
சிக்கற பிகர் கூட எல்லாம் கடலை போட்டாலும், சில பிகர்களுக்கு மட்டும் தான் EC Recharge பண்ணி தருவார்.
நல்ல அனுபவம் உள்ள ஆள்களுடன் மட்டும் தான் குடிக்க போவார், புது பசங்களோட போய் அவங்க மட்டையாயிட்டா சிக்கல் என்று காரணம் சொல்லுவார்.
ஸ்கூல் பொண்ணுகளை பார்ப்பது இவருக்கு பிடித்த ஒன்று. பிடிக்காதது ஸ்கூல் பொன்னுகளோடு பேசுவது. ஏதாவது பேசினால் கூட்டத்தில் 'அங்கிள்' என்று சொல்லிடுவாங்களே என்று பயப்படுவார்.
இவர் ஏரியா பலான தியேட்டரில் ரிலீஸ் ஆகும் எல்லா ஷகிலா படத்தையும் பார்த்திருக்கிறார். அந்த தியேட்டரில் இவருக்கு தனி அக்கவுண்ட் இருக்கிறது.
குடிச்சுட்டு வீட்டில் இருக்கும் போதும், ஒயின் ஷாப் லீவு அன்றைக்கும் பிட்டு காட்சிகளை பார்த்து கொண்டிருப்பார். அவருக்கு பிடிச்ச காட்சி _____
A,B,C,D நாப்பது எழுத்து என்ற அளவில் ஆங்கிலம் தெரிந்திருந்த போதும் பேஷன் டிவியை இரவு முழுக்க பார்ப்பார்..
ஆங்கில இசை சானல்களை அதிகம் பார்ப்பார். காரணம் இசை பிரியம் இல்லை. வால்யூமை மியூட் பண்ணி விட்டு ஷகிராவின் இடுப்பை ரசித்து கொண்டிருப்பார்.
உலகமயமாக்களை எதிர்ப்பவர் என்ற போதிலும், பாரின் சரக்கு கிடைத்தால் சந்தோஷமாக குடிப்பார்.
மஞ்சள், ஊதா, ஆரஞ்சு, ரோஸ் போன்ற கண்ணைப்பறிக்கும் வண்ண உடைகளையே அணிவார். அப்பத்தாண்டா நாலு பொண்ணுங்க திரும்பி பார்ப்பாங்க என்பார்.
சைக்கிளே சரியாக ஓட்டத்தெரியாது என்றாலும், நண்பர்களின் பைக் மீது ஏறி உக்காந்து வித விதமாக படம் எடுத்துக்கொள்வார்.
வீட்டில் இவரை தண்ணி தெளித்து எப்படியோ தொலஞ்சு போடா என்று விட்டு விட்டாலும், உறவினர் வீட்டு விஷேசங்களுக்கு தானே போய் சைட் அடித்து விட்டு, முதல் பந்தியில் சாப்பிடுவதை விரும்புவார்.
படிக்கத்தெரியாது என்றாலும் படம் பார்ப்பதற்காகவே வண்ணத்திரைக்கும், சினிமா எக்ஸ்பிரஸ்க்கும் சந்தாதாரராக இருக்கிறார்.
தளபதி நடிகர் தன்னை விட பர்சனாலிட்டியில் கம்மிதான் என்று நினைத்தாலும் அவரது அந்த கால சங்க கவி படங்கள் இவருக்கு ரொம்ப புடிக்கும்.
எந்த மொழியும் எழுத படிக்க தெரியாதே தவிர, நிறைய மலையாள படம் பார்த்து மலையாளம் பேச கற்று கொண்டுள்ளார்.
பெட் அனிமல் வளர்ப்பது ரொம்ப பிடிக்கும், அவர் ஏரியா ஒயின்ஷாப் அருகில் உள்ள ஒரு தெரு நாய்க்கு தினமும் பொறை வாங்கி போடுவார்.
எப்பவாவது சரக்கு ஒத்துக் கொள்ளாமல் வாந்தி எடுத்து விட்டால், அது தனக்கு பெருத்த அவமானமாக கருதி அடுத்த நாள் முழுதும் குடிக்க மாட்டார்.
நள்ளிரவில் வெளியே வரவே பயப்படும் அளவுக்கு வீரம் இருந்தாலும், நடக்கும் போது காலரை தூக்கி விட்டுக்கொண்டே நடப்பார்..
பஸ்சில் போகும் போது எப்பவும் புட் போர்டில் தொங்கி கொண்டு தான் போவார். ஒருமுறை கீழே விழுந்து முன்னாடி மூணு பல் எகிறியபோதும் அந்த பழக்கத்தை மாற்றவில்லை.

படியளக்கும் பரமசிவனும், நானும்

2009-10-22T16:11:00.009+05:30

எல்லா உயிர்க்கும்
எப்படியும் படியளக்கும்
பரமசிவனின் பட்டியலில்,
எப்படி விட்டு போனது
என் பெயர்?

தகவல் அறியும் சட்டத்தில்
தயக்கத்தோடு கேட்டால்,
கணக்கெடுக்கும் அதிகாரி வருகையில்
வீட்டில் இல்லாதது உன் தவறென்று
வந்தது பதில்.

மறுபடியும் பெயர் சேர்க்க
மனு கொடுத்து விட்டு,
சோறு தேட போகாமல்
வீட்டுக்குள்ளே காத்திருக்கிறேன்
ஆண்டவனின் அதிகாரிக்காக..

'புதிய தலைமுறை' வார இதழில் சக பதிவர், சகோதரர் 'முரளி'

2009-09-30T11:22:00.005+05:30

புதிதாய் அறிமுகமாகியிருக்கும் 'புதிய தலைமுறை' வார இதழ் குறித்த விளம்பரங்களை தொலைக்காட்சியில் பார்த்து இருப்பீர்கள். ஐந்து ரூபாய் விலையில் மிக நல்ல தரத்துடன் வந்துள்ள இந்த வார இதழில் நமது சக பதிவர், எங்க ஊர்க்காரர், சகோதரர் 'முரளிகுமார் பத்மநாபன்' அவர்களின் கருத்து வெளியாகி உள்ளது மகிழ்ச்சி அளிக்கிறது.

"பணம், பொருள், அதிகாரம்., இதெல்லாம் இருப்பவரின் குரல் மட்டுமே இப்போது மேலோங்கி ஒலிப்பதை நான் அறவே வெறுக்கிறேன். ஒடுக்கப்பட்டோரின் குரலையும் சமூகம் செவிமடுக்க வேண்டும்" என்ற சீரிய கருத்தை இன்றைய இளைய தலைமுறை விரும்பும் மாற்றமாக கூறிய இவரது நல்ல மனதை வாழ்த்துவோம்.

எனக்கு தெரிந்த ஒருவரின் கருத்து ஒரு வார இதழில் வெளி ஆகி இருப்பது எனக்கு மிகவும் பெருமை. வாழ்த்துக்கள் அண்ணா..

காலமானார் கதை சொல்லும் தாத்தா..

2009-09-16T17:12:00.005+05:30

இன்று ஒரு தகவல் அப்படின்னு முதலில் சென்னை வானொலியிலும், பின்னாளில் தொலைக்காட்சியிலும் தினமும் குட்டி குட்டி கதைகள் சொல்லி நம்மை சிரிக்கவும், சிந்திக்கவும் வைத்து கொண்டிருந்த பெரியவர் தென்கச்சி. கோ. சுவாமிநாதன் அவர்கள் இன்று (16.09.2009) காலமானார்.

" தத்துவம்ங்கறதுல ரெண்டு வகை உண்டு. ஒன்னு தத்துவம், இன்னொன்னு மகா தத்துவம். தத்துவம்ன்னா என்னன்னு தெரியுமா, கேக்கறவங்களுக்கு புரிய கூடாது, மகா தத்துவம்ன்னா சொல்றவங்களுக்கும் புரிய கூடாது.. அந்த வகைல பார்த்த இன்று ஒரு தகவலும் மகா தத்துவம் தான் " இப்படி அவரே நகைச்சுவையாக தன்னடக்கத்தோடு சொன்னதுண்டு.. ஆனால் உண்மையில் பெரிய பெரிய கருத்துகளை எல்லாம் அனைவருக்கும் புரியும் வகையில் குட்டி கதைகள் மூலம் விளக்கி சொல்லும் திறமை வாய்ந்தவர் தென்கச்சியார்.

இவர் 'தெம்புக்கு படிங்க', 'சிந்தனை விருந்து', 'அய்யாசாமியின் அனுபவங்கள்', 'தகவல் கேளுங்கள்', 'சிரிப்போம் சிந்திப்போம்', 'மனசுக்குள் வெளிச்சம்' போன்ற புத்தகங்களை எழுதி உள்ளார்.

இவரை அறிந்தவர்கள் யாரும், இவரை ரசிக்காமல் இருக்க மாட்டார்கள். மெல்லிய குரலில், கதை போதித்த தாத்தாவின் ஆத்மா சாந்தியடைய இறைவனை பிரார்த்திப்போம்.

வாழ்த்துக்களால் வளர்ந்தேன்..

2009-09-13T11:00:00.003+05:30

நேத்து என் பிறந்த நாள். அது வருசா வருஷம் வந்துட்டுத்தான் இருந்தது. ஆனா நேத்து மாதிரி நெறைய பேரு வாழ்த்துனதா நியாபகம் இல்ல. இதுதான் பதிவுலகின் சிறப்பு.

நேத்து காலைல கணினிய திறந்ததும் வாழ்த்து மழைல நனைஞ்சுட்டேன் போங்க. ஏகப்பட்ட வாழ்த்துக்கள், போன் கால்கள், டாக்டர் சார் போட்ட வாழ்த்து இடுகை, இடுகை போடறேன்னு அடம்பிடிச்ச நண்பர்கள், முதல்லையே சொல்லி இருக்கலாமேன்னு அன்பாக கடிந்து கொண்டவர்கள் என எல்லாமே எனக்கு புது அனுபவமா இருந்துச்சு..

ரொம்ப மகிழ்ச்சி, உங்கள் பாசம் தான் என்னை வளர வைக்கிறது. அனைவருக்கும் மீண்டும் ஒரு முறை நெஞ்சார்ந்த நன்றிகள்..

'உலக நாயகன்' கமல் ஹாசன் - 50 இனிமையான பாடல்கள்..

2009-09-10T13:32:00.013+05:30

கமல்

தமிழ் சினிமாவின் தவப்புதல்வன், நடிகர் திலகத்தின் நடிப்புலக வாரிசு. சினிமாவில் நுழைந்து 50 வருடங்கள், தன்னை முழுமையாக கலைக்காக அர்பணித்து கொண்ட அபூர்வகலைஞன்.. இத்தனை வருடத்தில் எத்தனை எத்தனை வேடங்கள், எத்தனை முயற்சிகள், எத்தனை தோல்விகள். எத்தனை விமர்சனங்கள், எத்தனை சர்ச்சைகள்..

எதையும் தாங்கும் இதயத்தோடு தமிழ் சினிமாவை உலக அரங்கில் தூக்கி பிடித்து கொண்டிருக்கும் உலக நாயகனுக்கு நன்றிகள்.. உயிரோடு இருக்கும்போது யாரையும் பாராட்ட மனம் இல்லாத தமிழகத்தில் பிறந்ததற்கு அனுதாபங்கள்..

கமலின் எண்ணற்ற வெற்றி பாடல்களில் ஐம்பது பாடல்கள் உங்களுக்காக.. (பாடலை சொடுக்கி தரவிறக்கி கொள்ளலாம்).

உன்னை நெனச்சேன் பாட்டு படிச்சேன்.. (ஆபூர்வ சகோதரர்கள்)
கடவுள் அமைத்து வைத்த மேடை.. (அவள் ஒரு தொடர்கதை )
இஞ்சி இடுப்பழகா (தேவர் மகன்)
என்னடி மீனாட்சி (இளமை ஊஞ்சலாடுகிறது)
பேரை சொல்லவா... (குரு)
நீ பார்த்த பார்வைக்கு (ஹே ராம்)
சின்னப்பூ.. சின்னப்பூ (ஜப்பானில் கல்யாண ராமன்)
தாலாட்டுதே வானம் (கடல் மீன்கள்)
காதல் மகராணி (காதல் பரிசு )
கூ கூ என்று குயில் கூவாதோ (காதல் பரிசு)
கண்மணியே பேசு (காக்கி சட்டை)
பட்டுக்கன்னம் தொட்டுக்கொள்ள.. (காக்கி சட்டை )
வானிலே தேனிலா.. (காக்கி சட்டை)
தில்லு பாரு ஜானே (கலைஞன்)
எந்தன் நெஞ்சில் (கலைஞன்)
ஸ்ரீ ரங்க நாதனின் (மகாநதி)
தை பொங்கலும் (மகாநதி)
அடி அரைச்சு அரைச்சு (மகராசன்)
ஹலோ மை டியர் (மன்மத லீலை)
சின்னஞ்சிறு வயதில் (மீண்டும் கோகிலா)
ராதா.. ராதா.. (மீண்டும் கோகிலா)
ரம் பம் பம் ஆரம்பம் (மைக்கேல் மதன காம ராஜன்)
சுந்தரி நீயும் (மைக்கேல் மதன காம ராஜன் )
வசந்த கால (மூன்று முடிச்சு)
கண்ணே கலைமானே ( மூன்றாம் பிறை)
கண்மணி அன்போடு (குணா )
ஒரு நிலவும் மலரும் (நானும் ஒரு தொழிலாளி )
ஒரே ஜீவன்.. (நீயா)
எங்கேயும் எப்போதும் (நினைத்தாலே இனிக்கும் )
ஏபிசி நீ வாசி.. (ஒரு கைதியின் டைரி)
என்ன சத்தம் இந்த நேரம் (புன்னகை மன்னன்)
கால காலமாக (புன்னகை மன்னன் )
கவிதை கேளுங்கள் (புன்னகை மன்னன்)
சிங்களத்து சின்ன குயிலே (புன்னகை மன்னன் )
அந்தி மழை (ராஜ பார்வை)
இளமை இதோ இதோ (சகலகலா வல்லவன்)
நிலா காயுது (சகலகலா வல்லவன்)
மௌனமான நேரம் ( சலங்கை ஒலி)
மாருகோ மாருகோ ( சதிலீலாவதி)
வளையோசை கலகலவென ( சத்யா)
நினைவோ ஒரு பறவை (சிகப்பு ரோஜாக்கள்)
உனக்கென்ன மேலே நின்றாய் (சிம்லா ஸ்பெசல்)
இன்னும் என்னை என்ன ( சிங்கார வேலன்)
நான் என்பது நீ அல்லவா -( சூர சம்ஹாரம்)
நானாக நானில்லை ( தூங்காதே தம்பி தூங்காதே)
ஜெர்மனியின் செந்தேன் மலரே ( உல்லாச பறவைகள்)
இதழில் கதை எழுதும் ( உன்னால் முடியும் தம்பி)
எங்கே என் ஜீவனே ( உயர்ந்த உள்ளம்)
வாழ்வே மாயம் (வாழ்வே மாயம்)
சிப்பி இருக்குது (வறுமையின் நிறம் சிவப்பு)

இன்னும் நிறைய நல்ல பாடல்கள் இருக்கின்றன. எல்லாத்தையும் இணையத்தில் ஏற்றுவது சாத்தியமில்லை. உங்களுக்கு வேறு ஏதாவது பாடல் தேவைப்பட்டால் பின்னூட்டத்தில் குறிப்பிடவும். கொடுக்க முயற்சிக்கிறேன்.

த்ரிஷா வீடியோ இருக்கா.

2009-09-07T12:40:00.005+05:30

"மாப்ள த்ரிஷா வீடியோ இருக்கா.. " "நமீதா வீடியோ ஒன்னு வந்துருக்காமா.. " இதெல்லாம் என் கிராமத்தில் நான் அதிகம் எதிர் கொள்ளும் கேள்விகள். இந்த கேள்விகளை அவர்கள் என்னிடம் கேட்க காரணம், நான் இது போன்ற வீடியோக்களை அவர்களிடம் ஏற்கனவே கொடுத்திருப்பேன், இல்லை அந்த விஷயங்களை அவர்களிடம் விவாதித்திருப்பேன் என்பதல்ல. நான் Browsing Center என அழைக்கப்படும் இணைய தள மையம் ஒன்றை நடத்தி வருகிறேன் என்பதே.

இது மட்டும் அல்ல, தினமலர் போன்ற நாளிதழ்களும் 'கலாச்சாரத்தை சீரழிக்கும் இணைய தள மையங்கள்' என மிக கேவலமாக எங்களை குறித்து தொடர்ந்து எழுதி வருகிறது. ஒரு சிலர் செய்வதற்காக எல்லாரையும் கயவர்கள் என்பது எவ்விதத்தில் நியாயம்.

இணைய தளம் மையம் நடத்தி வருபவர்கள் எல்லாரும் ஆபாச காட்சிகளை பார்ப்பதையும், அதை வைத்து காசாக்குவதையும் தான் தொழிலாக செய்து வருகிறார்கள் என்பது ஏற்க முடியாதது. கேபிள் டிவி பார்க்கும் அனைவரும் பேஷன் டிவி மட்டுமே பார்க்கிறார்கள் என்பதை போன்றது இது.

நல்ல தளங்களை காட்டிலும், ஆபாசத்தை கூறு கட்டும் தளங்கள் தான் இணையத்தில் அதிகம் என்பது மறுக்கப்படாத உண்மை. ஆனால் அதை காட்டி காசு பார்க்கும் நோக்கம் எங்களில் பலருக்கு இல்லை. நான் எனது மையத்தில், 'ஆபாச / சட்ட விரோத தளங்களை திறக்காதீர்கள்' என பெரிய எழுத்தில் எச்சரிக்கை ஒட்டி வைத்திருக்கிறேன். அவற்றை யாராவது பார்ப்பதாக தெரிந்தால் அதை பார்க்க கூடாது என எச்சரிப்பதையும் வழக்கமாக வைத்துள்ளேன்.

இணையத்தில் எத்தனை அற்புத வசதிகள் இருக்கிறதென்பதை சொல்லி தெரிய வேண்டியதில்லை. வெளிநாட்டில் வேலை பார்க்கும் மகனோடு பேசி விட்டு வெளியே வரும் தந்தையின் மகிழ்ச்சி எங்கள் தொழிலின் சிறப்பை சொல்லும்.
பல கல்லூரி மாணவர்கள் 'பிராஜக்ட்' முடிக்க அவர்களை விட நாங்கள் தூக்கம் கெடுகிறோம்.

பல பெரியவர்கள், பல மாணவிகள் இணைய தள மையத்துக்கு வந்து செல்கிறார்கள். இணையம் தரும் பலன்களை முழுமையாக அவர்களை பயன்படுத்தி கொள்ள விடுங்கள். சிலர் செய்வதை மட்டுமே எடுத்துக் கொண்டு இணையம் பயன்படுத்துவதே ஆபாசத்துக்குத்தான் என்ற தோற்றத்தை உருவாக்காதீர்கள். உண்மையை ஆராயாமல், புரௌவ்ஸிங் சென்டர் என்றாலே ஏதோ பலான இடம் என்பதை போல் பார்க்கும் மனப்பான்மையை மாற்றுங்கள்.

மீண்டும் ஒரு சிக்கலான தொடர்பதிவு..

2009-09-05T11:22:00.005+05:30

எல்லாரும் ஏகப்பட்ட சரக்கை டிராப்ட் ல எழுதி வச்சுட்டு, அதை வெளியிட நேரம் இல்லாம இருக்கும் போது, என்ன எழுதறதுன்னு தெரியாம நானும் கடை நடத்திட்டு இருந்தேன். இந்த நேரம் பார்த்து இரும்புத்திரை அரவிந்த் அண்ணாவும், கனவுகளே டாக்டர் சாரும் இந்த தொடர்பதிவுக்கு கூப்பிட்டுட்டாங்க.. ஆனா இது ரொம்ப சிக்கலான பதிவு.. ம்ம்ம்.. சமாளிக்கிறேன்.. ரெடி..

இதன் விதிகள்:

1.அழைத்தவரை அறிமுகம் செய்தல்.

2.விதிகளைப் பதிவிலிட வேண்டும்.

3.எல்லா ஆங்கில எழுத்தில் உள்ள கேள்விக்கும் பதில் அளிக்க வேண்டும்.

4.பதிவின் முடிவில் நான்கு பேரை மாட்டிவிட வேண்டும்.

5.அந்த நால்வருக்கும் ஓலை அனுப்பவேண்டும்.

6.அழைக்கப் பட்டவர்களையே அழைக்காமல் புதியவர்களை அழைக்க வேண்டும்.

*********
இனி...

1. A – Avatar (Blogger) Name / Original Name : /அச்சம் தவிர் /லோகு

2. B – Best friend? : Friends எல்லாருமே Best தான்.. (மூழ்காத ஷிப்..)

3. C – Cake or Pie? : Pie (கேக் அலர்ஜி)

4. D – Drink of choice? 'ஆ' வின் பால்.. (நாங்களும் டோனி மாதிரி தான் )

5. E – Essential item you use every day? கை விரல்கள்.. (உழைக்கும் கரங்களே)

6. F – Favorite color? நீலம்.. வானத்தை தொட்டு விட நினைப்பவனுக்கு வேறு என்ன நிறம் பிடிக்கும்?? (கொஞ்சம் ஓவராத்தான் போறமோ??)

7. G – Gummy Bears Or Worms : நம்ம ஊர்ல கிடைக்கற அயிட்டமா சொல்லுங்கப்பா..

8. H – Hometown? - கோவை (திருப்பூர்னும் சொல்லிக்கலாம்)

9. I – Indulgence? - இந்த வார்த்தைக்கு நிறைய அர்த்தம் இருக்கறதால எதை கேக்கறீங்கன்னு தெரியல.. so PASS...

10. J – January or February? - பிப்ரவரி (காதலை சொல்ல தேதிகள் உண்டு)

11. K – Kids & their names? என் கூட சேர்ந்து Discuss செய்ய ஆளை தேடிட்டு இருக்கேன்..

12. L – Life is incomplete without? Love (காதல் இல்லை என்று சொன்னால்.. )

13. M – Marriage date? - பாரும்மா எல்லாரும் இதையே கேக்கறாங்க.. சீக்கிரம் பொண்ணு பாருங்க..

14. N – Number of siblings? 2

15. O – Oranges or Apples? ஆப்பிள்..

16. P – Phobias/Fears? Ophidiophobia (பாம்பை கண்டா படையே நடுங்கும் )

17. Q – Quote for today? முயற்சி தன் மெய்வருத்த கூலி தரும்..

18. R – Reason to smile? அகத்தின் வலியை மறைக்க முகத்தில் போடும் ஒப்பனை..

19. S – Season? மழை காலம்

20. T – Tag 4 People?-
அன்பு,
பித்தன் இல்லைஇல்லை ஞான பித்தன் ,
ஜெட்லி / சித்து,
காயத்ரி (பிரிவையும் நேசிப்பவள்)

21. U – Unknown fact about me? ஆரம்பத்துல நான் விஜய் ரசிகனா இருந்தேன்.. (அஞ்சாவது படிக்கும் போது)

22. V – Vegetable you don't like? பீட்ரூட் (உவ்வே)

23. W – Worst habit? நகம் கடிக்கறது.. (இப்ப குறைச்சுட்டேன்)

24. X – X-rays you've had? ஒரே ஒரு தடவை தலைல அடிபட்டு, அதுக்காக எடுத்தது.. (மூளை இருந்ததான்னு தெரியல)

25. Y – Your favorite food? பிரியாணி வகைகள்... (பிரியாமணி என்றும் படிக்கலாம் )

26. Z – Zodiac sign? மேஷம் (இதுலயும் First தான் )

***********

அன்புக்குரியவர்கள்: அன்பானவர்கள்..
ஆசைக்குரியவர்: நிராசை ஆக்கியவர்..
இலவசமாய் கிடைப்பது: புன்னகை..
ஈதலில் சிறந்தது: இல்லாதவர்க்கு ஈதல்
உலகத்தில் பயப்படுவது: பாம்புக்கு..
ஊமை கண்ட கனவு: நிறைய இருக்கு..
எப்போதும் உடனிருப்பது: பிரிவின் வலி..
ஏன் இந்த பதிவு: நட்புக்காக
ஐஸ்வர்யத்தில் சிறந்தது: நோயற்ற வாழ்வு..
ஒரு ரகசியம்: ரகசியமாகவே இருக்கட்டும்..
ஓசையில் பிடித்தது: காலையில் எழுப்பும் தாயின் குரல்..
ஔவை மொழி ஒன்று: அன்னையும் பிதாவும் முன்னறி தெய்வம்
(அ)ஃறிணையில் பிடித்தது: பூனைக்குட்டி(கள்)

காதலிலே தோல்வியுற்றால்..

2009-08-31T21:36:00.004+05:30

மனசு வலித்தது, நெஞ்சு கனத்தது
நீ கல்யாண பத்திரிகை நீட்டியதும்..

உன் மேல் வைத்த காதலின்
உண்மை அன்பை உணர்த்த
ஏதாவது செய்தாக வேண்டுமென
இதயம் துடித்தது..

தற்கொலை செய்துகொள்ள
துணிச்சல் இல்லை..
தாடியோடு சுற்றினால்
வீட்டில் இடமில்லை..

பிளேடால் கீரிக்கொன்டால்
B +ve க்கு வழியில்லை..
நல்ல விதமாய் சேர்த்து வைக்க
'நாடோடிகள்' இல்லை..

சாராய பாட்டிலோடு
தேவதாஸ் ஆக
சரக்கு ஒன்னும்
ஓசியில் கிடைப்பதில்லை..

என்ன செய்யலாம் என
இரண்டு நாள் யோசித்து

அழகாய் பெண் குழந்தை பெற்று,
அவளுக்கு உன் பெயரை வைப்பதென
பெண் பார்க்க சொல்லிவிட்டேன் வீட்டில்..

விஜய் ரசிகர்களுக்கு வாழ்த்துக்கள்...

2009-08-27T11:30:00.003+05:30

கொடநாடு தள்ளாடும் வேளையில்
கோபாலபுரத்தை எதிர்த்து
தனிக்கட்சி கண்டு,
தமிழக முதல்வர் ஆவார் என
தம்பிகள் நீங்கள் எண்ணி இருக்கையில்,

திராவிடத்தை விட்டு
தேசியத்தில் ஐக்கியமாகி,
தமிழர் நலன் காக்க
தந்திகளை பெற்றுக் கொண்ட
தலைவியின் கட்சியில் சேர்ந்து
வருங்கால முதல்வர் என்ன
வருங்கால பிரதமரே ஆகப்போகிறார்..

தேசியக் கட்சியாம் காங்கிரஸில்
வாசனின் சிபாரிசை,சிதம்பரத்தின் வாரிசை
தங்கபாலுவின் வீச்சை மீறி, வரப்போகும்
தமிழக ராகுல் காந்தி, இளைய தளபதி!!

மதுரையை கலக்கி, இன்று டெல்லியை கலங்கடிக்கும்
மண்ணின் மைந்தனோடு
துணை நின்று தோள் கொடுத்து,
தமிழுக்கு பெருமை சேர்க்கப்போகும்..

உங்கள் தலைவர்
இளைய தளபதியின்
உயிரின் மேலான ரசிகர்களுக்கு
உண்மையான நல்வாழ்த்துக்கள்....

டிஸ்கி 1: உஷாரய்யா..உஷாரு. ஜே.கே.ரித்தீஷ் உஷாரு.

டிஸ்கி 2: விஜயை ரசிக்காவிட்டாலும், அரசியல் நாகரீகத்தோடு அவர்க்கு வாழ்த்து சொல்ல தூண்டிய சக பதிவர் 'நமீதா தேசத்தில் வாழும் நல்முத்து' டகளஸ் க்கு நன்றி.. (மாப்ள, அவர் பிரதமர் ஆயிட்டா நீ கட்சி தாவிட மாட்டியே..)

டிஸ்கி 3: இந்த செய்தியை ஆதாரமாக கொண்டு எழுதப்பட்டது..

குற்ற உணர்ச்சி

2009-08-17T14:30:00.007+05:30

செய்யாத தர்மம்

நள்ளிரவு தாண்டிய வேளை
நெடுஞ்சாலை பயணம்
நொடிப்பொழுதில் கொடிய விபத்து
நிற்காமல் போன வாகன வெளிச்சங்கள்
நாக்கு வரண்டு, தண்ணீர் கேட்டு கதறி
நினைவு தப்பும் தருணம்.

கையில் நீரோடு அந்த உருவம்..
காலையில் வீட்டருகே
சோறு கேட்டுக் கெஞ்சிய
பிச்சைக்காரன்(ர்)....

**********

நண்பனின் தங்கை

'இதுல என்ன இருக்கு
உனக்கும் தங்கச்சி மாதிரி தானே' என கூறி
தன் தங்கையை என்னோடு
தனியே அனுப்பும் நண்பனிடம்
எப்படி சொல்வேன் - நாங்கள்
இருவரும் காதலிப்பதை...

தந்தை மகற் காற்றும் உதவி...

2009-08-04T11:55:00.007+05:30

அவ்வப்போது புதிதாய்
அறிமுகமாகும் நபர்கள் கேட்கும்
'அப்பா என்ன பண்றார்?' கேள்வியும் ,

திருமண வீடுகளில், தவறுதலாக
அடையாளம் தெரியாமல் கேட்கப்படும்
'அப்பா வரலையா' விசாரிப்புகளும்,

பார்வை மங்கிய பாட்டிகளிடம்
இன்னார் மகனென்று
எடுத்து சொல்லும் தருணங்களும்,

பார்த்து பார்த்து பூச்செடி வளர்த்து, அது
பூத்ததும், பக்கத்து வீட்டு பெண்ணை
பறித்து கொள்ள சொல்லும் அம்மாவும்,

தினம் தினம் கிழிக்கின்றன
தந்தை இழந்த மகனின் மனதை..

ஆகவே நண்பர்களே,

"தந்தை மகற் காற்றும் உதவி
தயவுசெய்து புகை பிடிக்காதீர்"

பாசத்துடன்,

நட்பே.. நட்பே..

2009-08-02T09:42:00.017+05:30

செயற்கரிய யாவுள நட்பின் அதுபோல்
வினைக்கரிய யாவுள காப்பு.
- திருவள்ளுவர்
(நட்பு கொள்வது போன்று அரிய செயல் இல்லை. அது போல் பாதுகாப்புக்கு ஏற்ற செயலும் வேறொன்றுமில்லை. )

நான் நிறைய கூச்ச சுபாவம் கொண்டவன். யாரிடமும் புதிதாக பேசுவதற்கு, பழ்குவதற்கு நிறைய தயங்குவேன். நிறைய தாழ்வு மனப்பான்மை உண்டு.. அதையெல்லாம் தாண்டி இப்போ ஓரளவுக்கு இருக்கேன் னா அதுக்கு என் சுபாவத்தையும் மீறி என்னோடு பழ்கிய என் நண்பர்கள் தான் காரணம். குணாதிசயம், பழக்கவழக்கங்களில் நிறைய வித்தியாசம் இருந்தாலும் நட்புன்னு ஒன்னு தான் எல்லாருத்துக்கும் பொதுவா இருக்குது.

சுயநலம் இல்லாமல் என் மீது அக்கறை கொண்ட உள்ளங்கள் நிறைய. அவங்களுக்கு நன்றி சொல்ல இந்த இடுகை.

எத்தனை பேர், எத்தனை விதமான பாசம், அக்கறை. நினைச்சாலே கண் கலங்குது. சின்ன வயசுல இருந்து இன்னைக்கு வரைக்கும் என் கூட நட்பா இருக்கற சந்துரு. எனக்கும் இவனுக்கும் நிறைய சண்டை வந்து இருக்கு. ஆனாலும் மறுபடி பார்த்தா பேசாம இருந்தது இல்லை. அவன் வீட்ல தூங்குனத விட என் வீட்ல தான் அதிகம் இருந்திருப்பான்.

ஆரம்ப பள்ளி படிக்கும் போது இப்போது வரை என்னை மறக்காமல் இருக்கும் செல்வா, வடிவு, ரத்தின குமார், கோபால், படிக்கும் போது படிப்புல போட்டி போட்ட பாலவிமலேஷ்வரி, உயர்நிலை பள்ளியில் உரிமை எடுத்துக்கொண்ட சன்முககுமார், சண்முகராஜ், சதா, வினோ, விஜி, விஜி, சதிஸ், சதிஸ், மகேஷ், மகா, குமார், குமார், சுரேஷ், தங்கராஜ், கனகராஜ், மருதாசலம், பிரதாப், ரமேஸ், தேனுங்கராஜ், நந்து, செல்வராஜ் இன்னும் நிறைய பேர்.. உங்களோட பழகுன அந்த நாட்கள் தான் என் வாழ்க்கையில் வசந்த காலம். I really miss u all...

பள்ளி படிப்பை முடிச்சு பாலிடெக்னிக் சேர்ந்த போதுதான் என் தாழ்வு மனப்பான்மை அதிகம் தலை தூக்கியது. அதில் இருந்து மீள உதவிய இன்று வரை நெருக்கமாக இருக்கும் மகேந்திரன், கோபால், செந்தில், தினேஸ், ரவி, ராஜேஷ், அருணாச்சலம், சரவணன், மோகன், கமல் இன்னும்.... உங்க உதவிகளை நான் என்னைக்கும் மறக்க முடியாது.

அத்தை பெண்ணாக இருந்தாலும், அந்த உறவுகளை தாண்டி நட்போடு பழகும் அழகிய ராட்சஸி 'கௌதமி', இந்து, வித்யா.. நீங்க என்னோட நட்பா இருக்கறது எனக்கு பெருமை.. அப்புறம் சுமி, தேவா, கதிர், பிரகாஸ் உங்களையும் மறக்கல..

என் காதலி என்ன கலர் டிரஸ் போட்டுருக்கான்னு பார்த்து சொல்றதை கூட ஒரு வேலையா செஞ்ச ஆனந்த்.. "அவ இன்னொருத்தன லவ் பண்றாண்ணா" அப்படின்னு நீ சொல்லும் போது என்னை விட அதிகமான வலி உன் குரலில் தெரிஞ்சது.. விடு தம்பி இன்னார்க்கு இன்னார் என்று எழுதி வைத்தான் தேவன் அன்று.. அப்புறம் சக்தி, சசி, உமேஷ், சுகுமார்...

வேலை செய்த போது பழகிய விஜிக்கா, லிஜி மேடம், ஜெயலக்ஸ்மி (Miss U Akka), ராஜேந்திரன், ஷியாம், கொஞ்ச நாள் பழக்கத்திலேயே எனக்காகஅக்கறை படும் சதிஸ், என் வளர்ச்சியில் அக்கறை கொண்ட சபா அண்ணா, நண்பனோட நண்பன் தான் என்றாலும்என் தொழிலுக்ககா அக்கறை காட்டிய கார்த்திக்.. We miss u Karthik.. எப்ப இந்தியா வர்றீங்க... சிகா, பாபு உங்க அக்கறை தான் என்னை இந்த அளவுக்கு கொண்டு வந்து இருக்கு..

நட்புக்கு பணம், அந்தஸ்து எதுவும் தேவையில்லை என்பதை மீண்டும் ஒருமுறை ஆழமாக உணர்த்திய கலையரசி.. அடிக்கடி பேசாட்டியும் என் பெஸ்ட் பிரண்ட் நீங்கதான். உமா உங்களையும் மறக்க முடியாது..

ஆர்குட் மூலமா பிரெண்ட் ஆன ஜெகதீஸ் (Luckiest Person in the world), சந்தோஸ், இன்னும் நூத்துக்கு மேற்பட்ட பிரெண்ட்ஸ்..

அப்புறம் பதிவுலகம் கொடுத்த ஏராளமான நண்பர்கள், குறிப்பா அண்ணனாய் இருந்து அக்கறை காட்டும் கார்த்திகை பாண்டியன், இன்னொரு அண்ணன் பித்தன் விஜய், என்னோட பல விஷயங்கள்ல ஒத்து போகும் அன்பு, டக்ளஸ் ராஜு, காயத்ரி, ஜெட்லி, சித்து, வேத்தியன், திருப்பூர்ல இருக்கேன் அப்படிங்கற ஒரே காரணத்துக்காக என் தொழில் மீது அக்கறை காட்டும் வெயிலான் ரமேஸ், சொல்லரசன், முரளி இன்னும் நிறைய... என்னை பின் தொடர்பவர்கள்..என் ஒவ்வொரு பதிவுக்கும் ஒட்டு, பின்னூட்டம் அளித்து ஊக்குவிக்கும் உள்ளங்கள்.. நான் எழுதறதையும் IST பண்ணி பாராட்டும் துஷ்யந்தன்.. (இந்திய தமிழ்ர்கள் எல்லாரும் நல்லவங்கதான் பாஸ்...)

இதில் சில பேர் தவறுதலா விட்டு போய் இருக்கலாம்.. ஆனா உங்க நட்பு என்னை விட்டு போகல..

இனிய நண்பர்கள் தின வாழ்த்துக்கள்..

நட்புடன்,

தண்ணீர் தேசம்

2009-07-31T11:58:00.008+05:30

நீரின் றமையா துலகெனின் யார்யார்க்கும்
வானின் றமையா தொழுக்கு.
- திருவள்ளுவர்

(உலகில் மழையே இல்லை என்றால் ஒழுக்கமே கெடக்கூடும் என்ற நிலை இருப்பதால், நீரின் இன்றியமையாமையை உணர்ந்து செயல் பட வேண்டும்.)

செத்து போங்கடான்னு
சாபம் விடுமா,

நாசமா போங்கன்னு
மண்ணள்ளி தூற்றுமா,

தரித்தரம் பிடிக்கட்டும் என
காரி துப்புமா,

நன்னீரின் நிலை கண்டு
கண்ணீர் விடுமா??

தாய்க்கும் மேலான
தண்ணீரை கெடுத்தவர்களை
தீயிட துடிக்குமா??

என்ன நினைக்கும்??

கூவத்தையும்,
நொய்யலையும் பார்க்கும்,
காவேரிக் கரை விவசாயியின் மனம்..

************************

ஆதங்கத்துடன்,

என்னை காதலியுங்களேன் பிளீஸ்..

2009-07-30T12:04:00.005+05:30

ஒரு வாரமாக
இடுகைகள் எதுவும் இல்லை..

பார்த்தவர்கள் எண்ணிக்கை
பத்தை கூட தாண்டவில்லை..

ஈ கூட மொய்க்கவில்லை
என் வலைப்பூவில்..

அரசியல் பதிவெழுதினால்
ஆட்டோ வரும்...

விமர்சன பதிவெழுதி கிழிக்க
விஜய் படமும் இல்லை..

மொக்கை எழுதினாலும்
மவுசு இல்லை இப்போது..

எதிர்கவுஜ எழுதவும்
எக்கசக்க போட்டி இங்கே..

காதல் கவிதை எழுதினால் மட்டுமே
களை கட்டும்..

அதற்காகவாவது ஏற்றுக்கொள்
என் காதலை.. பிளீஸ்..

கலைந்த கனவு..

2009-07-03T14:18:00.005+05:30

நேற்றிரவு ஒரு கனவு..

பூங்கா நாற்காலி ஒன்றில்
பக்கத்து பக்கத்தில் அமர்ந்திருக்கிறோம்..

நான் கவிதை சொல்கிறேன்,
நீ காதலோடு கேட்கிறாய்..

தேவதைகளின் தேவதை நீ என்கிறேன்..
அழகின் அர்த்தம் நீதான் என்கிறேன்..
நாணத்தோடு கேட்டு ரசிக்கிறாய்..

நட்சத்திரங்கள் உன் கண்களுக்கு இணையில்லை என்கிறேன் ..
உலக அழகிகள் உனக்கு ஈடில்லை என்கிறேன்..
நெஜமாவா என்று புருவம் உயர்த்துகிறாய்..

சின்னதாய் தேகம் தொடுகிறேன்,
செல்லமாய் சுட்டு விரல் நீட்டி மிரட்டுகிறாய்..

கேலியாய் ஏதோ சொல்ல,
கோபம் காட்டி துரத்துகிறாய்..

ஏதோ தடுக்கி நீ கீழே விழப்போக,
சட்டென கனவு கலைந்து எழுந்தேன்

நினைவுக்கு வருகிறது உன் முகம்,
கூடவே அவனும்..

கண்ணீரை துடைத்து கொண்டு புரண்டு படுத்தேன்..
கலைந்தது கனவு மட்டும் இல்லை..

காதல் மழையே..

2009-06-30T19:02:00.007+05:30

மேகத்தில் இருந்து குதித்து
தற்கொலை செய்து கொள்ளும்
லட்சம் துளிகளில், சில துளிகள் மட்டும்
மோட்சம் பெறுகின்றன உன் மேனி தொட்டு..

****

உன்னோடு செல்ல வேண்டி
தினமும் மழை பெய்ய பிரார்த்திக்கிறது
உன் வீட்டு குடை...

உன் மேனி நனைக்க வேண்டி
தினமும் நீ குடையை மறக்க பிரார்த்திக்கிறது
மழை மேகம்...

****

உன் மேல் விழும்
ஒவ்வொரு உப்புத் துளியும்
புனிதமடைந்து தீர்த்தமாகின்றது..

அதை தேடி தேடி குடித்து
சாகா வரம் பெறுகின்றன
உன் வீட்டு எறும்புகள்..

****

நீ தலை துவட்டும் போது
ஈரத்தோடு சேர்த்து உன் முடிகளையும்
ஞாபகமாய் எடுத்து கொள்கிறது துண்டு..

அதையும் நான் பறித்து கொள்வதுண்டு,
என் தேவதையின் சொத்தென்று...

****
நீ மழையில் விளையாடும்
அழகை பார்க்கவே
உன் வீடு நோக்கி நகர்கின்றன
எல்லா மேகங்களும்..

****
உன்னை நனைக்க
முடியாத சோகத்தில்
என் வீட்டில் வந்து அழுது தீர்க்கின்றன
துரதிர்ஷ்ட மேகங்கள்..

இங்கேயே தேங்கி இருங்கள்,
அவள் வரும் போது பாதம் தொடலாம் என
ஆறுதல் சொல்கிறேன் நான்..

****

பிரிதொரு பிறவி இருந்தால்
பாவை உன்னை தொடும்
ஒரு துளியாக பிறப்பேன்..

உன் உதட்டில் விழுந்து
என் உயிர் துறப்பேன்..

அத்தைக்கு பிறந்தவளே..

2009-06-26T11:45:00.015+05:30

அத்தை பொண்ணு / மாமா பொண்ணு இதெல்லாம் கற்பனைல நல்லாத்தான் இருக்கும்.. ஆனா நெஜத்துல ரொம்ப கொடுமை அது..
அதுவும் கொஞ்ச அழகா இருந்துட்டா அவங்கள நாம லூஸ்ல விடவும் முடியாது.. அவங்க பண்ற கொடுமைகளை தாங்கித்தான் ஆகணும்..

தனியா இருக்கும் போது கண்டுக்கவே மாட்டாங்க. ஆனா நம்ம வீட்டு பெரியவங்க முன்னாடி 'நான் ரொம்ப நல்லவன்' ன்னு காட்டறதுக்காக நாம ஒரு ஓரமா நிக்கும் போது தானா வந்து தோள்ல கை போடறது, முதுகுல அடிக்கறதுன்னு நம்மை நெளிய வைப்பாங்க..

எனக்கு அவசரமா ஒரு 50 ரூபா டாப் அப் போட்டுடான்னு சொல்லிட்டு கட் பண்ணிருவாங்க.. மிஸ்டு கால் கொடுக்க கூட காசில்லாம நம்ம பொருளாதாரம் இருக்கும்..

தப்பி தவறி நம்ம மொபைல் அவங்க கைல கெடச்சுட்டா அவ்ளோதான்.. ரொம்ப நாள் கஷ்டப்பட்டு, SMS அனுப்பற அளவுக்கு கரெக்ட் பண்ணி வச்சுருக்கற பிகர், இனிமேல் நம்ம பேரை கேட்டாலே காரி துப்பர அளவுக்கு பண்ணிடுவாங்க..

காலங்காத்தால போன் பண்ணி "எனக்கு ரிசல்ட் வந்துருச்சாமா.. பாத்து சொல்லுன்னு.." கொல்லுவாங்க.. நம்ம ரிசல்ட்டயே நாலு நாள் கழிச்சு பாக்கற நாம, அவ கிளாஸ் புல்லா எல்லாரோட ரிசல்ட்டையும் லைவ் கமெண்டரி பண்ண வேண்டிய நிலைமை வரும்.

வில்லு படம் சூப்பரா இருக்காமா.. டிவிடி வாங்கி கொடுன்னு கொடுமை படுத்துவாங்க.. வில்லு டிவிடி இருக்கான்னு கேட்டா திருட்டு விசிடி விக்கறவன் கூட நம்மளை திருதிருன்னு பார்ப்பான்..

சரி நம்ம மேல இவ்வளோ உரிமையா இருக்காளே, நம்மள லவ் பண்ணுவாளோன்னு கற்பனை குதிரைல ஏறும் போது, 'என் கிளாஸ் மேட் ஒருத்தன் சூர்யா மாதிரியே இருப்பான் தெரியுமான்னு' குண்ட தூக்கி குதிரை கால்லயே போடுவாங்க..

வீட்டுக்கு காய்கறி வாங்க கடைக்கு போறத கூட கௌரவ கொறச்சலா நெனைக்கற நம்மள அப்பப்ப டிரைவராகவும், பாடி கார்டாகவும் யூஸ் பண்ணுவாங்க..

இப்படி அத்தை பெத்த அழகிய ராட்சசிகள் பண்ற அன்புத் தொல்லைகள் ஏராளம். என்னதா கொடுமை பண்ணினாலும், 'போடா லூசுன்னு' அவ செல்லமா அடிக்கும் போது கிடைக்கற சுகம் இருக்கே.. அதெல்லாம் அனுபவிச்சாத்தான் தெரியும்..

காதல் இல்லை என்று சொன்னால்..

2009-06-25T10:35:00.014+05:30

காட்சி 1:
இடம் : அவனது அலுவலகம் நேரம்: இரவு 10 மணி

அவசரமாக முடிக்க வேண்டிய வேலை ஒன்றை அவன் கணினியில் தட்டச்சி கொண்டு இருக்கிறான். எப்படியாவது இந்த வேலையை முடித்து விட்டு தான் தூங்க வேண்டும் என்ற முடிவோடு பரபரப்பாக தட்டச்சி கொண்டு இருக்கிறான்.

ஸ்பீக்கரில் "காதல் செய்தால் பாவம்.. பெண்மை எல்லாம் மாயம்... " பாடிக் கொண்டிருக்கிறது..

செல்போனில் மெசேஜ் டோன் ஒலிக்கிறது.. சுவாரஷ்யமின்றி எடுத்து பார்க்கிறான்.
உடல் சிலிர்க்கிறது.. பிரகாசமாகிறது முகம். குறுஞ்செய்தி அனுப்பியது அவள்..

அவள் : "Don't miss or avoid d person who really had a true affection on u. it may make u feel when they live without u and your memories....."

அவசர அவசரமாக பதிலளிக்கிறான்..

அவன்: "hey... what a surprise.. ரொம்ப நாள் ஆச்சு மெசேஜ் அனுப்பி.. எப்படி இருக்கே? சாப்டாச்சா? "

அவள்: ஓ சாப்டாச்சு.. நீ சாப்டயா.. வீட்டுக்கு வந்தாச்சா..

அவன்: சாப்டாச்சு.. ஆனா இன்னைக்கு வீட்டுக்கு வரல.. ஆபிஸ்லதான் இருக்கிறேன்..

அவள்: ஏன்பா???

அவன்: கொஞ்சம் அவசர வேலை இருக்கு.. நாளைக்குள்ள முடிக்கணும்.. அதுதான்..

அவள்: சரி.. continue பண்ணு.. Good night.. Sweet dreams.. bye..

அவன்: ஒரு ஸ்வீட்டே ஸ்வீட் ட்ரீம்ஸ் சொல்லுதே...

அவள்: ரொம்ப ஐஸ் வைக்காத.. வேலைய பாரு..

அவன்: ஐஸ் கிரீமுக்கே யாரவது ஐஸ் வைக்க முடியுமா...

அவள்: ஐயோ முடியல... நா தூங்க போறேன்..

அவன்: கனவுலையும் என் கூடத்தான் பேச போற.. அதுக்கு இப்பவே பேசலாம்ல..

அவள்: ஆசைதான்.. டைப் பண்ணி முடிச்சுட்டு சீக்கிரம் தூங்குடா.. Bye..

அவன்: சரிங்க மேடம்.. Good night...

நாற்காலியில் சாய்ந்து அமர்ந்து சோம்பல் முறித்தான்.. கற்பனையில் கொஞ்ச ஆரம்பித்தான்..

ஸ்பீக்கரில்
"காதல் இல்லை என்று சொன்னால் பூமியும் இங்கில்லை..
காதல் இன்றி யாரும் இங்கில்லை..." யேசுதாஸ் பாடி கொண்டிருந்தார்..

அப்படியே தூங்கி போனான்..

**************

காட்சி 2:
இடம் : அவனது அலுவலகம்
நேரம்: அதிகாலை 4.10 மணி..

அவன் திடுக்கிட்டு எழுந்தான். மணியை பார்த்தான்.. ச்சே என்று தலையில் கை வைத்தான்.. பாத்ரூம் போய் அவசர அவசரமாக முகம் கழுவி விட்டு வந்து வேக வேகமாக டைப் அடிக்க தொடங்கினான்..

***********

காட்சி 3:
இடம் : அவனது அலுவலகம்
நேரம்: காலை 6 மணி..

மலைப்பாக இருந்தது. இன்னும் பாதி வேலை கூட முடியவில்லை. டைப் அடிக்கவே முடியவில்லை. தூங்கி தூங்கி விழுந்தான்.... கீ போர்டில் Q எங்கே இருக்கிறது என்று தேடி கொண்டிருந்தான்.

ஸ்பீக்கரில் "காதல் பண்ணாதீங்க.. காதலே பண்ணாதீங்க..
ஆசை வைக்காதீங்க.. ஆபத்தில் சிக்காதீங்க...

ஒரு வழியாக Q வை கண்டு பிடித்து அழுத்தும் போது, செல்போனில் மெசேஜ் டோன் ஒலித்தது.. வேண்டா வெறுப்பாய் எடுத்து பார்க்கிறான்..

உடல் சிலிர்க்கிறது.. பிரகாசமாகிறது முகம். குறுஞ்செய்தி அனுப்பியது அவள்..
....

***************

டிஸ்கி: லேபிளை கவனிக்கவும்..

மரிக்கொழுந்து வாசம்..

2009-06-22T16:14:00.007+05:30

மஞ்சள் ரோஜா

மழைத்துளி

பூனைக்குட்டி

Bru Coffee

கருப்பு சுடிதார்

Dairymilk

'ஒன்றா இரண்டா ஆசைகள்' பாடல்

விஜய் படம்

Johnson & Johnson Baby soap

மரிக்கொழுந்து வாசம்..

இப்படி அவளுக்கு பிடித்த ஏதாவது ஒன்றாய்
என்னை படைத்திருக்க கூடாதா இறைவா..............

காதல் காய்ச்சல்..

2009-06-19T14:44:00.009+05:30

2 ஊசி, 14 மாத்திரை, ஒரு பாட்டில் குளுகோஸ்,
பத்திய சாப்பாடு, 3 நாள் பெட் ரெஸ்ட்
இப்படி எதுவுமே குணப்படுத்த முடியாத
காய்ச்சல் காணாமல் போனது..
உன் "Get well Soon" குறுஞ்செய்தியில்...
*********

உடல் சுடுகிறது..
ஆனால் உள்ளம் குளிர்கிறது
நீ ஊருக்கு வந்த சேதி கேட்டு..
*********

நடக்க கூட முடியவில்லை
காரணம் காய்ச்சல்..
உன்னோடு பேசிய பின் மிதக்கிறேன்
காரணம் காதல்..
*********

மழையில் நனைந்தால்
காய்ச்சல் அதிகமாகுமாம்..
சில நாட்களுக்கு என் முன்னால் வராதே..
********

வைரல் பீவராம்
டாக்டர் சொன்னார்...
பாவம் அவருக்கு எப்படி தெரியும்
உன்னை பாக்காததால் வந்த
காதல் பீவர் என்று...
*********

சத்துள்ள ஆகாரமாய்
சாப்பிட சொன்னார்..
உன் உதடுகளில் இருக்கிறது
எனக்கான ஹார்லிக்ஸ்..
அப்படியே சாப்பிடட்டுமா??

32 கேள்விகளும் 32 பதில்களும் அப்புறம் நானும் - தொடர் பதிவு..

2009-05-27T11:32:00.010+05:30

தொடர் பதிவு..
ம்ம்ம்ம்...பெருமைதான்..
நிலாவும் அம்மாவும்.

கார்த்திகைப் பாண்டியன்.

பிரியமுடன் ...வசந்த்...

டாக்டர் SuREஷ்
கடைக்குட்டி

இப்படி (இன்னும் பல) பெரிய திறமைசாலிகள் வரிசையில் ஒரு முட்டாள் பையனாக நானும்.. கடைக்குட்டிக்கு நன்றிகள்..

1 . உங்களுக்கு ஏன் இந்தப் பெயர் வந்தது? உங்களுக்கு உங்க பெயர் பிடிக்குமா ?
அப்பா வச்ச பேரு.. அப்பாவோட சின்ன வயசுல ஒரு இன்ஸ்பெக்டர் யை பார்த்து நமக்கு ஒரு பையன் பொறந்தா இவர மாதிரி லோகநாதன் னு பேர் வைக்கனும்னு நெனச்சாராம்..
ஆச்சர்யமாய் நானும் பரணி நட்சத்திரத்திலேயே பிறக்க ஜாதகப் படியும், அப்பா ஆசைப்படியும் வச்ச பேரு.. சுருக்குமா லோகு.. புடிக்காம இருக்குமா..

2.கடைசியாக அழுதது எப்பொழுது?
15.6.2007 ஒரு இரவு முழுவதும்..
3.உங்களோட கையெழுத்து உங்களுக்கு பிடிக்குமா?
படிக்கும் போது அழகா எழுத வந்துச்சு.. (நெறைய விசேச வீடுகள்ல மொய் வசூல் எழுதி இருக்கேன்)... இப்ப அவ்ளோ சரியில்லை..
4.பிடித்த மதிய உணவு என்ன?
சிக்கன் பிரியாணி..

5.நீங்கள் வேறு யாருடனாவது உங்களோட நட்பை உடனே வச்சுக்குவீங்களா?
இல்லை.. நண்பர்கள் மிக குறைவு.. (பெண் நண்பிகள் 1, 2, 3, 4 .......) ஆனா எல்லாரிடமும் நன்றாக பழகுவேன்..

6.கடலில் குளிக்க பிடிக்குமா....அருவியில் குளிக்க பிடிக்குமா?

அருவி பார்த்ததே இல்லை.. கடலில் குளிக்கவும் அவ்ளோ ஆர்வம் இல்லை.. பாத்ரூமில் குளிக்கத்தான் புடிக்கும்..
7.முதலில் ஒருவரைப் பார்க்கும் போது எதை கவனிப்பீர்கள்?
முகத்தை... அழகு பெண்கள் என்றால் கண்டிப்பாக கண்களை..

8.உங்க கிட்ட உங்களுக்கு பிடிச்ச விஷயம் என்ன? பிடிக்காத விஷயம் என்ன ?
பிடித்த விஷயம் : எதையும் ஏத்துக்கொள்ளும் மனப்பக்குவம் வந்திடுச்சுன்னு நினைக்கிறேன்.. பிடிவாதம் கிடையாது.. விட்டு கொடுத்து பழகியாச்சு..
பிடிக்காத விஷயம்: தெளிவான முடிவுகள் எடுக்க தெரிவதில்லை.. அலைபாயும் மனம்..
9.உங்க சரி பாதி கிட்ட உங்களுக்கு பிடித்த பிடிக்காத விசயம் எது?
இந்த கேள்விக்கு பதில் வேணும்னா எங்க அம்மா கிட்ட சொல்லி சீக்கிரம் மண்டபம் & நல்ல நாள் பாக்க சொல்லுங்க.. (பொண்ணு நானே பாத்துக்குவேன்..ஹி..ஹி..)
10.யார் பக்கத்துல இல்லாம இருக்குறதுக்கு வருந்துகிறீர்கள் ?
அப்பா..
(ஆண்களே தயவு செய்து புகை பிடிக்காதீர்கள்.. ஒரு நாள் உங்கள் குழந்தையும் இப்படி வருந்தலாம்.. )
11.இதை எழுதும் போது என்ன வர்ண ஆடை அணிந்து உள்ளீர்கள் ?
அடர் சாம்பல் நிறத்தில் முழுக்கை பின்னலாடையும் (Full sleeve T-Shirt), நீல வர்ணத்தில் ஜீன்ஸும்

12.என்ன பார்த்து//கேட்டுக் கொண்டு இருக்குறீங்க ?

'வெண்மதி வெண்மதியே நில்லு.. ' மின்னலே பட பாடல்..

13.வர்ணப் பேனாக்களாக உங்களை மாற்றினால் என்ன வர்ணமாக உங்களுக்கு ஆசை?
நீலம்...
14.பிடித்த மணம்?
நிறைய மணம் பிடிக்கும்..
மாம்பழ மணம், மண் வாசனை, குழ்ந்தைகளின் வாசனை, புது புத்தகத்தின் வாசனை என நிறைய இருக்கு...

15.நீங்க அழைக்கப் போகும் பதிவரிடம் உங்களுக்கு பிடித்த விஷயம். அவரை அழைக்கக் காரணம் என்ன ?
தீப்பெட்டி : தீ பொறி பறக்க எழுதறவர்.. என்ன எழுதுனாலும் பின்னூட்டமிடும் ரொம்ப நல்லவர்..
சொல்லரசன்: எங்க ஊர்க் காரர்.. சமூக பார்வையோடு எழுதுபவர்.. எனக்கு தொடர்ந்து ஆதரவளிப்பவர்..
விக்னேஸ்வரி : அருமையான எழுத்து நடைல எழுதுவாங்க.. என்னோடு சண்டைல ஆரம்பிச்சு சமாதானம் ஆனவங்க..
பித்தன்: ரொம்ப புரட்சிகரமா எழுதறவர்.. முற்போக்கு எழுத்தாளர்.. கவிஞர்.

16.உங்களுக்கு இதை அனுப்பிய பதிவரின் பதிவில் உங்களுக்குப்பிடித்த பதிவு ?
எல்லாமே புடிக்கும்.. திரை விமர்சனங்கள், சூர்யா பற்றிய பதிவுகள்..
17. பிடித்த விளையாட்டு?
கிரிக்கெட்..
18.கண்ணாடி அணிபவரா?
இல்லை...
19.எப்படிப்பட்ட திரைப்படம் பிடிக்கும்?
நகைச்சுவை படங்களும், மனதை பாதிக்கும் கருத்தாக்கம் உள்ள படங்களும்..
20.கடைசியாகப் பார்த்த படம்?

தியேட்டருக்கு போய் 4 மாசம் ஆச்சு.. சுப்ரமணியபுரம் னு நினைக்கிறேன்.. கடைசியாக youtube ல் பார்த்தது மௌனம் பேசியதே..
21.பிடித்த பருவ காலம் எது?
மழைக்காலம்
22.என்ன புத்தகம் படித்துக் கொண்டு இருக்கீங்க?
அதிகம் படிப்பதில்லை.. ஆனந்த விகடன் மட்டும்..

23.உங்கள் டெஸ்க்டொப்-ல் இருக்கும் படத்தை எத்தனை நாளுக்கு ஒரு நாள் மாற்றுவீர்கள்?
அடிக்கடி.. தினசரி அப்படின்னு கூட சொல்லலாம்.. பெரும்பாலும் பாவனா படங்கள்தான்..
24.பிடித்த சத்தம் ? பிடிக்காத சத்தம்?
பிடித்த சத்தம்: 'பூ பூக்கும் ஓசை' னு சொன்னா உதைக்க மாட்டீங்களே..
பிடிக்காத சத்தம்: வாகனங்களின் ஹார்ன் சத்தம்..

25.வீட்டை விட்டு நீங்கள் சென்ற அதிக பட்ச தொலைவு?

திருப்பதி..
26.உங்களுக்கு ஏதாவது தனித் திறமை இருக்கிறதா?
இல்லை..
(பாட்டில் மூடி சிக்கிகிச்சுனா அடியில தட்டி ஒப்பன் பண்றது தனிதிறமையா??)
27.உங்களால் ஏற்றுக் கொள்ள முடியாத ஒரு விஷயம்?
ஏழ்மையை ஏளனம் செய்தல்..
28.உங்களுக்கு உள்ளே இருக்கும் சாத்தான்?
தாழ்வு மனப்பான்மை..
29.உங்களுக்கு பிடித்த (சுற்றுலா) தலம்?
சுற்றுலாக்கள் அதிகம் சென்றதில்லை.. பழைய கோயில்கள் பிடிக்கும்.. திருவண்ணாமலை கோயில் பெஸ்ட் ஜாய்ஸ்..
30.எப்படி இருக்கணும்னு ஆசை?
பிரபலமாய்..
பணக்காரனாய்..
உலகம் சுற்றும் வாலிபனாய்..
31.மனைவி(கணவன்) இல்லாம செய்ய விரும்பும் ஒரே காரியம் ?
இன்னும் கல்யாணம் ஆகலையே...
32.வாழ்வு பற்றி ஒரு வரி சொல்லுங்க?
B+.. நாளை நமதே..

நடிகர் (வருங்கால முதல்வர்) விஜய்க்கு..

2009-05-26T11:54:00.009+05:30

இந்த பதிவு பரிசல்காரன் அவர்களின் இந்த பதிவை படித்த பின் ஏற்பட்ட தாக்கத்தால் எழுதப்பட்டது.. (எதிர் பதிவு அல்ல)

*****************************************************

அன்புள்ள ‘இளைய தளபதி’ டாக்டர்.விஜய்க்கு..

பல நடிகர்களுக்கு ஏற்கனவே வந்து விட்ட ஞானோதயம் உங்களுக்கு லேட்டாக வந்திருக்கிறது. ஞானோதயம் என்றால் ரஜினி மாதிரி இமய மலைக்கு போவதல்ல.. அரசியலுக்கு வந்து மக்களுக்கு சேவை செய்யும் ஞானோதயம்.

நீங்கள் அடுத்த சூப்பர் ஸ்டார் என்று உங்கள் அடிவருடிகள் சொல்லி கொண்டிருக்க நீங்கள் அதற்கு மேலே போய், அடுத்த V.T.R. (விஜய T. ராஜேந்தர் ) நிலைக்கு உயர்ந்து இருக்கிறீர்கள்.. திருமலை படத்தில் 'வாழ்க்கை ஒரு வட்டம்' என்று நீங்கள் பேசிய போதே எனக்குள் ஒரு நம்பிக்கை பிறந்தது.. அடுத்த படங்களில் 'பொறந்தது திருப்பாச்சி, வளந்தது சிவகாசி, மொத்தத்தில் நான் ஒரு பரதேசி' என்றெல்லாம் ரைமிங்காக பேசினீர்கள்.. திடீரென்று ஏன் இந்த V.T.R. பாசம் என்றால்... பிரஸ்மீட்டில் அவர் மாதிரியே கத்தி உங்கள் அரசியல் ஆசையை வெளிக்காட்டி விட்டீர்கள்..

மேலும் அதை உறுதி படுத்துவது.. . ஆனந்த விகடனில் வெளியான உங்கள் பதில். ‘நான் கட்சி துவங்க வேண்டும் என்பது என் ரசிகர்களின் விருப்பம். என் பிறந்தநாளன்று நல்ல முடிவு சொல்லுவேன்’ என்றிருக்கிறீர்கள்..

உங்களை கட்சி ஆரம்பிக்க சொல்லுபவன் உண்மையாக உங்கள் ரசிகனாக இருக்க முடியாது.. உங்கள் வெறியனாக தான் இருக்க வேண்டும்.. நீங்கள் ஏன் கட்சி தொடங்கி நாட்டுக்கு நல்லது செய்ய வேண்டும் என்பது உங்கள் கடந்த கால திரைக்காவியங்களை பார்த்தாலே தெரியும்..

'நெஞ்சினிலே' இந்த காவியத்தில் 3 மணி நேரம் காய விட்டு கடைசி காட்சியில் 30 கும் மேற்பட்ட வில்லன்களை உங்கள் தந்தையார் எழுதிய வசனத்தை பேசியே திருத்துவீர்கள்.. இந்த ஒரு தகுதி போதாதா அரசியலில் ஜொலிப்பதற்கு.. அங்கு பேச்சுத்தானே முக்கியம்..

'தமிழன்' இத்திரைப்படத்தில் கல்லூரிக்கு போகாமலே அனைவருக்கும் சட்டம் சொல்லி கொடுப்பீர்கள்.. வக்கில்கள் அடிக்கடி வேலை நிறுத்தம் செய்யும் இந்த வேளையில் இது எவ்வளவு உதவிகரமான சேவை..

'புதிய கீதை' இம்மகா காவியத்தின் கடைசி காட்சியில் கலாபவன் மணி 'வா சாரதி! வா" என்று ஹை பிட்சில் கத்தியதும், பக்கத்து சீட் குழ்ந்தை அழுததும் அன்றே உங்களை அரசியலுக்கு வர சொல்லித்தான் என்பது எனக்கு இன்று தான் புரிகிறது..

இதையெல்லாம் சொல்ல நீ யார் என்று கேக்காதீர்கள்.. நீங்கள் தமிழ் சினிமாவுக்கு ஆற்றிய சேவை எனக்கும் என் நண்பர்களுக்கும் மிக புடிக்கும். நாங்கள் ராஜ் டிஜிட்டல் பிளசில் நீங்களும் சங்கவியும் தமிழ் சினிமாவுக்கு ஆற்றிய சேவையை தூங்காமல் இருந்து ரசித்தவர்கள்.. உங்கள் சேவை தமிழக அரசியலுக்கும் தேவை.. அட்லீஸ்ட் ஏதாவது ஒரு கட்சிக்கு பிரச்சாரமாவது செய்யுங்கள்..

அரசியலுக்கு வராமல் மட்டும் விட்டு விடாதீர்கள் பிளீஸ்..

அரசியல் தான் உங்கள் எதிர்காலம்.. அதை மறந்து விடாதீர்கள்.. J.K. ரித்தீஸ் இடம் கற்று கொள்ளுங்கள். அரசியலில் முழு மூச்சாய் இறங்குங்கள்.. கருத்தே சொல்லாத கார்த்தி எல்லாம் பத்தாயிரம் ஓட்டு வாங்கும் களம் அது.. சூட்டிங்கே போகாமல் ஓட்டலில் தூங்கினாலும் அவர் கட்சி நடத்தி கொண்டு தான் இருக்கிறார் என்பதை பத்தாயிரம் மக்கள் அறிவர்..

எங்களுக்கு தேவை உங்கள் சேவை. உங்களால் முடிந்த சேவையை செய்யுங்கள். அதற்கு நீங்கள் ஒரு கட்சி தலைவனாக இருக்கத்தான் வேண்டும்..

புரிந்து கொள்வீர்கள் என்ற நம்பிக்கையில் எழுதப்பட்ட இந்தக் கடிதத்தை திரு.எஸ்.ஏ.சந்திரசேகரிடம் காட்டுங்கள்.

அளவில்லா அன்போடு,
உங்கள் படம் பார்த்து
காதில் வலியும் ரத்தத்தை துடைத்து
கொண்டே வெளியே வரும்

மிக சாதாரண ரசிகன்..

நம் மீதான ஒரு இலங்கை தமிழரின் கோபம். - பதில் என்ன..

2009-05-20T11:06:00.009+05:30

துஷ்யந்தன்- பிரான்ஸ் வாழ் இலங்கை தமிழர்...
அவரது உறவினர்கள் விடுதலை புலிகள் அமைப்பில் இருந்து சமீபத்தில் இறந்துள்ளனர்..
எனது பதிவுகளின் மூலம் எனக்கு நண்பரானார்..
நேற்று கூட என்னோடு தொலைபேசியில் பேசினார்..
இந்நிலையில் சற்று முன் அவரிடமிருந்து மிக கோபமாக கீழ்கண்டவாறு ஒரு மின்னஞ்சல் வந்தது..
(தங்கிலிஷ் இல் எழுதி இருந்தார், நான் தமிழ் படுத்தி யுள்ளேன்)

"லோகு
ரொம்ப கஷ்டமா இருக்கு
நான் கொஞ்சம் கூட எதிர் பார்க்கல
இப்போ கூட நம்ப முடியல
இதே பொய்யா இருக்கும் என்றே நினைக்கிறேன்
உண்மையாவே பொய்தான்..

ரொம்ப கோவம் வருது
இதுக்கு காரணமே சோனியா தான்
இவ்ளோ பிரச்சனைக்கு பின்னும் சோனியாவ தூக்கி மேல வச்சது நீங்கதான் (உங்க சனம்)
இன்றைக்கு பிரபாகரன் செத்ததும் நீலிக்கண்ணீர் வடிக்க தமிழ்நாட்டில் நிறைய கூட்டம் இருக்கும் ... அவங்களுக்கும், ஏன் உங்களில் யாருக்குமே தலைவர பத்தி பேச உரிமை இல்லை, தகுதியும் இல்லை..
இன்றைக்கு தலைவரோட, எங்களோட இந்த நிலைமைக்கு காரணம் இந்தியா, இந்தியா, இந்தியா தான்..

பிரான்ஸ் வந்தது முதல் இன்றைக்கு நான் அழுதே இருக்கேன்.
சோகத்த விட உங்கள் நாட்டின் மேல் இருக்கும் கோபம் தான் அதிகம்..
தலைவர கடைசி நிலைல கூட நீங்க நெனச்சு இருந்தா காப்பாத்தி இருக்கலாம்.. அதை நெனச்சாத்தான் ரொம்ப கவலையா இருக்கு..

ஒன்று மட்டும் லோகு,, கொஞ்ச நாள் மட்டும் கிடைச்சு இருந்தாலும், இப்படி ஒரு தலைவர் கிடைச்சதுக்கு நாங்கள் பெருமை பட்டு தலை நிமிர்ந்து நிக்கிறோம்.. ஆனா நீங்க??
உங்க நாட்டு பெரிய அரசியல் (தறுதலைகள்) வாதிகளை நினைச்சு வெக்கப்பட்டு தலை குனிஞ்சு நிக்கணும் லோகு..
எங்களுக்கு உங்கள மாதிரி தனி நாட்டு இல்லாட்டியும், நல்ல தலைவன் இருந்தான்.. அதையும் உங்க புத்திசாலி தனத்தால இல்லாம ஆக்கிட்டீங்க... வாழ்த்துக்கள்..

எனக்கு ஒன்று மட்டும் புரியல.. தமிழ் நாடு சோனியா வோட சொத்தா.. வெயிட் பண்ணுங்க.. ஒரு நாள் சோனியா தமிழ்நாட்டையும் ஸ்ரீ லங்க வெறியன் ராஜபக்சேவுக்கு (கச்சா தீவு மாதிரி) எழுதி வச்சாலும் ........( இதற்கு பின் அவர் எழுதிய சில வார்த்தைகள் எனக்கு புரியவில்லை )
ஏன்னா உங்களுக்கு நாடா முக்கியம், 100 ரூபா தாளும், பிரியாணியும் கிடைச்சா போதுமே..

ஒருத்தியோட பழி வாங்கும் கொலை வெறிக்கு ஒரு நாட்டையே (ஈழ்ம்) பலியாக்கிட்டீங்க...
ஈழாத்தோட மக்களில் 75% யை அழிச்ச பெருமை உங்களுக்கும் சோனியாவுக்கும் தான்..
குமுதம் ஞானியிடம் சொல்லி வாங்கி கொள்ளுங்கள் ஆளுக்கொரு இவ்வார பூச்செண்டு..

என்னோட ஒரு கேள்விக்கு மட்டும் பதில் பிளீஸ் ராஜீவ் காந்தியை கொன்னாங்க, கொன்னாங்க என்றே சொல்லி எங்களை ஒதுக்கி இவ்ளோ பெரிய தண்டனை கொடுத்துட்டீங்களே..
(எங்கள் நாட்டில் உங்கள் ராஜீவ் அனுப்பிய மிருகங்கள் செய்த வெறியாட்டம் ஒருபுறம் இருக்கட்டும்)
அந்த ராஜீவ பெத்த இந்திராவ கொன்னது யாரு??
உலகத்துக்கே கிடைக்காத உங்களுக்கு கிடச்ச மகாத்மாவ கொன்னது யாரு??? இதையெல்லாம் செய்த உங்களுக்கு என்ன தண்டனை கொடுக்கலாம்..
மகாத்மா இப்போ உயிரோடு இருந்திருந்த உங்களை நெனச்சு வெக்கி தலை குனிந்து இருப்பார்..

எங்களோட ரத்த கண்ணீர உங்க 'அபியோட' கிளிசரின் கண்ணீர் மறைத்து விட்டது.. அவ்ளோ தான்

போகட்டும், எங்களுக்கு புதுசு புதுசா பிரபாகரன் வந்து கொண்டு இருப்பார்கள்.. ஆனால் உங்களுக்கு???
நீங்க செய்த பாவத்துக்கு எத்தனை தலைமுறை சென்றாலும்.. மீண்டும் மீண்டும் இதே கருணாநிதியும், ஜெயலலிதாவும் தான்...
இதுதான் எங்கள் சாபம், உங்களுக்கு கொடுக்கும் தண்டனை..

லோகு.. நெறைய எழுதிட்டேன்... ஆனால் மன்னிப்பு கேக்க நான் தயார் இல்லை.. இறுதியாக உலகத்திடம் ஒன்று மட்டும்..

ஒ உலக நாடுகளே..
எங்கள் எதிரி ஸ்ரீ லங்காவை நாங்கள் பார்த்து கொள்கிறோம்..
எங்கள் நண்பன் இந்தியாவிடம் இருந்து எங்களை காப்பாற்று......

இப்படிக்கு துஷ்யந்தன் "

இந்த கோபம் நியாயமானதா??
கோபத்துக்கு என்ன பதில் சொல்வது.. நீங்களே பின்னூட்டத்தில் சொல்லுங்கள்..

காதல் முத்தி போச்சு..

2009-05-15T16:58:00.008+05:30

என் வீட்டு ரோஜா செடியில்
இரட்டை ரோஜா பூத்ததும்,

நேற்று சாயங்காலம்
வானவில் வந்ததும்,

மெல்லிய சாரலோடு
மெதுவாக காத்து வீசியதும்,

ஊர் ஓர மாந்தோப்பில்
மயில் தோகை விரித்து ஆடியதும்,

தெருவோர செண்பக மரம்
தெருவெல்லாம் பூக்களை சிந்தியதும்,

அன்றைக்கு ராத்திரி
ஆலங்கட்டி மழை பெய்ததும்

எல்லாமே என்னவள் நீ விடுதியில்
இருந்து வீடு வந்ததால் தான் என்றால்,
' உனக்கு முத்தி போச்சுடா' என்கிறான் நண்பன்..

உங்கள் காதலை தெரிந்து கொள்ள..

2009-05-08T12:06:00.006+05:30

காதல்..

இந்த மூன்றெழுத்து மந்திர வார்த்தையால் பாதிக்கப்படாதவர்களே இருக்க முடியாது..

ஒவ்வொருவருக்கும் தங்கள் காதலில் நம்பிக்கை இருந்தாலும், அது எவ்வளவு தூரம் ஜெயிக்கும் அப்படின்னு தெரிஞ்சுக்கறதுல எல்லாருக்கும் ஆர்வம் இருக்கும்..

காதலிக்கறவங்க, காதலிக்க போறவங்க.. காதலிச்சவங்க எல்லாருக்கும் இந்த லிங்க் உபயோகமா இருக்கும்

http://www.crushbits.com/findcrush/1078528

கிளிக்கி பாருங்க..
காதல் ரகசியமானது, மூட நம்பிக்கைகளுக்கு அப்பாற்பட்டது..

G.K. வாசனும், காமராஜர் சிலையும்..

2009-05-05T12:03:00.006+05:30

எனது அலுவலகத்துக்கு சற்று தொலைவில் ஒரு காமராஜர் சிலை இருக்கிறது.. அது தங்க முலாம் பூசப்பட்டது.. ஆனால் எப்பொழுதுமே கறுப்புக்கலரில் தான் இருக்கும். காமராஜர் கருப்பு என்பதால் ஒரிஜினாளிட்டிக்காக அப்படியே விட்டு விட்டார்கள் என்று நினைத்திருந்தேன்.. நான் இந்த பகுதிக்கு வந்து 5 மாதங்களுக்கு மேல் ஆகிறது.. ஒரு நாள் கூட இந்த சிலை சுத்தமாய் இருந்து நான் பார்த்ததில்லை..

நேற்று சுத்தமாக கழுவப்பட்டு மின்னிக் கொண்டு இருந்தது.. அதற்கு திருநீறு எல்லாம் வைத்து அமர்க்களப் படுத்தி இருந்தார்கள்.. அந்த இடம் முழுவதும் கூட்டி பெருக்கி, தோரணம் கட்டி அழகு படுத்தியிருந்தார்கள்.. பக்கத்திலேயே மேடை அமைக்கும் பணிகள் நடந்து கொண்டிருந்தன.. ஒரு மைக் கட்டிய கால் டாக்சியில் அன்பர் ஒருவர் கத்திக் கொண்டிருந்தார்..

"ஒரு ரூபாய்க்கு அரிசி கொடுத்த தலைவர் கலைஞர் அவர்களின் ஆசி பெற்ற வேட்பாளர் 'கார்வேந்தன்' அவர்களை ஆதரித்து வாக்கு கேட்க தலைவர் G.K. வாசன் அவர்கள் மாலை சரியாக 7 மணி அளவில் நமது பகுதிக்கு வருகை தர உள்ளார்"..
அந்த வேட்பாளர் காங்கிரஸ் கட்சிக்காரர்.. ஆனாலும் ஏனோ கலைஞர் சாதனைகளை (???) சொல்லியே ஒட்டு கேட்டுக் கொண்டிருந்தார்கள்..

அப்புறம் சாயந்தரம் வரைக்கும் காங்கிரசின் கொள்கை பாடல்கள் ஒளிபரப்பிக் கொண்டிருந்தார்கள்.. எல்லாமே சினிமா மெட்டில் மாற்றி அமைக்கப்பட்டவை.. எல்லா பாடல்களுமே காமராஜரை பற்றியும், இந்திரா அவர்களை பற்றியுமே இருந்தது.. அவர்கள் இருவருக்கு பிறகு காங்கிரசில் சொல்லிக் கொள்ளும்படி தலைவர்களே உருவாகவில்லையா..

மாலை சரியாக 7.10 க்கு வாசன் அவர்கள் வந்தார்.. பட்டாசு வெடித்ததில் இருந்து தெரிந்து கொண்டேன்.. என்ன பேசினார் என்பதெல்லாம் தெரியவில்லை(கேட்கவில்லை).. அவர் போன பிறகு ஒரு அரை மணி நேரத்துக்கு டிராபிக் ஜாம்.. பின்னர் சரியாகி விட்டது..

இன்று காலை வரும் போது பார்த்தேன்.. நேத்து போட்ட மாலைகள் எல்லாம் அகற்றப்படாமல் காய்ந்து, கவனிக்க ஆள் இன்றி தனது பழைய நிலைக்கு திரும்பிக் கொண்டிருந்தார் காமராஜர்..

அடுத்த கோஸ்டி தலைவர் எப்போ இங்கே பிரச்சாரத்துக்கு வருவார்??

நன்றி மறப்பது நன்றன்று..

2009-05-04T09:56:00.005+05:30

இந்த பதிவை எனது 50 வது பதிவாகத்தான் எழுத நினைத்திருந்தேன்.. எதிர்பாராத விதமாக 50 வது பதிவும், தல பிறந்த நாளும் ஒன்றாய் வர, முடியாமல் போனது..

அதனால் என்ன இப்ப சொல்லிட்டா போச்சு..

ஒவ்வொருத்தரும் நூற்று கணக்குல பதிவு போட்டு இருக்க, நாம 50 பதிவுக்கு அலட்டிக்கிறது கொஞ்சம் ஓவர்தானாலும், இது வரைக்கு கடைய நடத்துனதே பெரிய விஷயம்.

நா என்னதா குப்பையா எழுதுனாலும், அதற்கும் ஓட்டும், பின்னூட்டமும் போட்டு என்னை வழி நடத்திய அனைவருக்கும் நன்றி.. கண்டிப்பா உங்களோட ஒவ்வொரு எழுத்தும் எனக்கு டானிக் மாதிரி..

பல சமயங்கள்ல எனக்கு ஆலோசனையும், ஆதரவும் தந்த கார்த்திகை பாண்டியன் அவர்களுக்கு சிறப்பு நன்றிகள்..

பிரான்ஸில் இருந்து தொலைபேசியில் தொடர்பு கொண்டு மணிக்கணக்கில் பேசிய பிரான்ஸ் வாழ் இலங்கை தமிழ் நண்பர் 'துஷ்யந்தன்' அவர்களுக்கு நன்றி.. நீங்க மறுபடி அழைத்த பொது சில தவிர்க்க முடியாத சூழ்நிலையால் உங்களோடு பேச முடிய வில்லை.. அதனால் கோபம் கொள்ளாமல் இன்னும் எனது பதிவுகளை படிப்பீர்கள் என நம்புகிறேன்..

பதிவுலகில் நண்பர்களான மாப்ள டக்லஸ், சக்கர சுரேஷ், கடைக்குட்டி, veththiyan, சித்து, வெயிலான், சொல்லரசன், டாக்டர் சுரேஷ் இன்னும் பலருக்கு மீண்டும் நன்றிகள்.

மிக முக்கிய செய்தி:
இந்த புது பிளாக்கில் இருந்த குறைகளை மின்னஞ்சல் மூலம் சுட்டிக்காட்டிய அன்பு மாப்ள டக்ளசுக்கு ஒரு பெரிய டிரீட் வைக்கறன்னு சொன்ன போது
"தான் காந்திய வழிக்கு மாறி விட்டதாகவும், இனி பாட்டிலில் இருந்தால், பச்ச தண்ணியை கூட குடிக்க போவதில்லை" என்று முடிவெடுத்திருப்பதாக டக்லஸ் அவர்கள் தெரிவித்துள்ளார்..

வறுமையின் நிறம்...

2009-05-03T20:27:00.004+05:30

ஆசிரியர் கேட்ட கேள்விக்கு
பதில் தெரிந்தும் கை தூக்கவில்லை..

அக்குளில் கிழிந்த சட்டை..

*****

நூறு ரூபாய்க்கும்,
கோழி பிரியாணிக்கும்
நாங்கள் விற்பது
எங்கள் ஓட்டுரிமையை அல்ல..

ஒருவேளை பசியை..

****

பெட்ரோல் விலை ஏற்றமும்,
பஸ் கட்டண உயர்வும்,
எங்களை பாதிக்க போவதில்லை..

பழைய செருப்பு பிய்யும்வரை..

*****

பள்ளிக் கூடம் போனதில்லை
ஆனா கணக்கு நல்லா வரும்..

தீப்பெட்டி கம்பெனியில் எண்ணி, எண்ணி
தீக்குச்சி அடுக்கும் வேலை..

****

பரட்டை தலை,
கருத்த முகம்,
மெலிந்த உடல்,
சாயம் போன உடை..

கண்டிப்பாக வறுமையின் நிறம்
சிவப்பு இல்லை..

தல 'அஜித்' - சில அரிய புகைப்படங்கள் (50 வது பதிவு)

2009-05-01T17:18:00.008+05:30

நெஞ்சில் பட்டதை சொல்வானே!
நெத்தயடியிலே வெல்வானே!
நெருப்பின் புத்திரன் இவன்தானே!

பிறந்த நாள் வாழ்த்துகள் 'தல'

************************************

நேற்றைய IPL போட்டியில் ரெய்னா 98 ரன்கள் எடுத்திருந்த போதே சதம் கடந்து விட்டதாக எண்ணி அவர் உள்பட அனைவரும் நினைத்து விட்டார்கள். அதே போல என்னுடய சென்ற (49 வது) பதிவில் அதை எனது 50 வது பதிவு என எண்ணி வாழ்த்திய அனைவருக்கும் நன்றி.. உண்மையில் இதுதான் எனது 50 வது பதிவு.

ஹமாம் விளம்பரத்துக்கு எதிர்பதிவு..

2009-05-01T11:01:00.004+05:30

நான்: மாப்ள போய் சரக்கு வாங்கிட்டு வர்றியா..
மாப்ள: சரி மச்சி.. நீ பக்கத்து கடைல சைடிஸ் வாங்கிடு..

மாப்ள வண்டியை எடுத்து கிளம்பிய உடன்..

நான்: "ஐயோ என்ன சரக்குன்னு சொல்லலையே ..
வேற ஏதாவது வாங்கிட போறா..
ரொம்ப கசக்குமே..
வயிறு எரியுமே..

வாந்தி வந்துரும்.. அப்புறம் என் பிரண்டுக்கு குடிக்கற ஆசையே போய்டுமே.. "

என்று பதறிக்கொண்டே நான் டாஸ்மாக் வரை போய் தேடிக்கொண்டு மீண்டும் வீட்டுக்கு வர

Already ஓபன் பண்ணி 'ஒரு ஆப்பை' முடுச்சுட்டு ஹாயாக படுத்துக்கொண்டு இருந்தான் என் நண்பன்..

(சரக்கு நீங்க நெனைக்கற அதே நல்ல சரக்குத்தான்.. )

*****

பி.கு : இந்த பதிவு பிரபல பதிவர் ஆகாய நதி அவர்கள் எழுதிய இந்த பதிவை படித்த பின் எழுதப்பட்டது..

அழகிய தமிழ் மகன் இவன்..

2009-04-28T15:06:00.006+05:30

பெப்சி விற்பனையில் திடீர் ஏற்றம் -
கொக்க கோலா
விளம்பரத்தில் அவன் ...

****

"என் மகன் ஆதரவு
யாருக்கும் இல்லை" -
தந்தை பேச்சு..
அனைத்து கட்சிகளும்
விட்டது பெருமூச்சு..

****

பறவைகளை சுடுபவன்
வேட்டைக்காரன்..
படக்கதைகளை சுடுபவன் ???

****

மருத்துவ மாணவர்கள்
சேர்க்கை குறைந்தது -

அவனுக்கு டாக்டர் பட்டம்!!

****

காதலிக்கு சோப்பு போடுபவன்
காதலன்..
அவள் அம்மாவுக்கும்
சோப்பு போடுபவன் ????

****

சங்கம் வைத்து

தமிழ் வளர்த்தான் அன்றைய தமிழன்

சங்கவியை வைத்து

தன்னை வளர்த்தான் இன்றைய 'தமிழன்'

*****

சொல்லாத காதல்..

2009-04-28T13:05:00.005+05:30

கால் நனைக்கும் அலைகளோடு
கடற்கரையில் கைகோர்த்து நடந்ததில்லை..

யாரும் இல்லாத தனிமையில்
நடுக்கத்தோடு உதடுகளை ஒட்டியதில்லை..

ஆள் இல்லா திரையரங்குகளில்
கார்னர் சீட்டில் கதை பேசியதில்லை...

புற நகர் பூங்கா நாற்காலிகளில்
மடியில் தலை வைத்து படுத்ததில்லை..

கூட்டமான பஸ் பயணங்களில்
குறுஞ்செய்தி அனுப்பி கொஞ்சிக்கொண்டதில்லை..

பேய் உறங்கும் வேளையிலும்,
போர்வைக்குள் போனை ஒளித்து
பேசியதில்லை..

செல்ல சண்டைகள் போட்டு பிரிந்து,
அடுத்த நாள் அனைத்தையும் மறந்து
தலை கோதியதில்லை..

பிப்ரவரி 14 க்கும்,
பிரிதொரு நாள் வரும் பிறந்த நாளுக்கும்,
பரிசுகள் வாங்க மெனக்கெட்டதில்லை..

உன் நினைவை சொல்லும்
கடிதங்களும் , காதல் பரிசுகளும்
இல்லை என்னிடம்..

நீ போகும் பாதையில் சிந்தி செல்லும்
புன்னகையையும், பூக்களையும்தான்
சேர்த்து வைத்து இருக்கிறேன்..

தெற்று பல் தெரிய சிரிக்கும்
உன் முகம் மட்டும்தான் நெஞ்சில்
இருக்கிறது ஞாபகார்த்தமாய்..

இருந்தாலும் சந்தோசமாகத்தான் இருக்கிறேன்..
சுகமாய்த்தான் இருக்கிறது இந்த தனிமையும்..

சொல்லாத காதலும் சொர்க்கம்தான்...
நீ எனக்கில்லை என சுடும் அந்த நொடிகளை தவிர...

நானும், என் காதலும்..

2009-04-27T19:44:00.007+05:30

"அவ வேறொரு பையன லவ் பண்றா மாப்ள"
நண்பன் சொன்ன இந்த வார்த்தைகளை கேட்ட நொடியில்
சுவற்றில் மோதிய கண்ணாடியாய் உடைந்தது
உன் மீதான என் காதல்..

மூன்று வருடமாய் முகம் மட்டும் பார்த்து
காதலை மறைத்தே வளர்த்த என்னால்,
காதல் தோல்வி தந்த
கண்ணீர் துளிகளை மறைக்க முடியவில்லை..

ஊர் உறங்கிய அன்றைய நடு நிசியில்
சத்தமில்லாமல் வாய் பொத்தி அழுத கண்ணீர் துளிகளோடு
கரைந்தது என் சொல்லாத காதல்...

அழுது களைத்த, ஆள் இளைத்த ஆறு மாதங்களுக்கு பின்
ஆச்சர்யமாய், ஆறுதலாய் வந்தது உன் நட்பு..
இனி உறவாட முடியாதெனினும்,
உரையாடவாவது முடிந்தது ஆறுதல்..

என்னவளை பறித்த,
உன்னவனை பற்றி
நீ பேசும் போதெல்லாம்,
காலடியில் சிக்கிய ரோஜாவை
கசங்குகிறது என் காதல்..

என்னை விட பொருத்தமானவன்
அவன் என தெரிந்தும்
ஏனோ சொல்ல முடியவில்லை
'எங்கிருந்தாலும் வாழ்க' என..

நண்பன் என்ற பேரில் போலியாய் சிரித்து,
என் காதலை கொல்வதை விட,
தூரத்தில் இருந்து அழுது
என் காதலை வளர்த்திக்கொள்வதே மேல்.

சொல்லாத காதல் தான், ஆனால்
செல்லாத காதல் இல்லை..
நட்பு கரம் நீட்டி அதை கொல்லாதே..

விலகியே நில்
விசும்பலோடு வளரட்டும் என் காதல்..
உன் காதல் கரையேறும்
ஒரு சுபயோக சுபதினத்தில்
என்னோடு மறையும் என் காதல்..

மறக்காமல் ஜோடியாய் வந்து
மலர் வளையம் வைத்து விட்டு போ,
எனக்கும் என் காதலுக்கும்..

அந்த ஒரு நாள்..

2009-04-26T10:04:00.005+05:30

ஏழு நாளும் உழைத்து களைக்கும் எனக்கு
எதிர்பாராமல் அன்று விடுமுறை..

பத்து மணி வரை படுக்கையில் கிடந்து,
பல்லு கூட விளக்காமல் பசியாறி..

மத்தியானம் வரைக்கும் மன்மத ராசாவை ரசித்து,
மச்சான், மாப்ளைகளோடு மங்காத்தா ஆடி..

சாயங்காலம் கொஞ்சம் கிரிக்கெட்டும் ஆடிக்களைத்து,
இரவுக்காட்சியில் 'அயன்' பார்த்து..

இன்பமாய் முடிந்தது
ஈழத்தமிழர்களுக்காக ஒருநாள் வேலை நிறுத்தம்..

ஐ.பி.எல். போட்டி - நேரடி வர்ணனை - ஒரு புதிய முயற்சி.

2009-04-21T15:14:00.057+05:30

வணக்கம், வலையுலக நண்பர்களே...

இது ஒரு புதிய முயற்சி. நடைபெற்றுக் கொண்டிருக்கும் ஐ.பி.எல். போட்டிகளில் இன்றைய போட்டியை நேரடி வர்ணனை செய்ய முயற்சிக்கிறேன். இது எவ்வளவு தூரம் வெற்றி பெறும் என்று தெரியவில்லை. எப்படி இருந்தாலும் உங்கள் ஆதரவையும், ஆலோசனைகளையும் எதிர்பார்க்கிறேன்.
புதிய ஸ்கோருக்கு அடிக்கடி Refresh செய்து கொள்ளவும்.
***************************************
முதல் பேட்டிங் பஞ்சாப் அணி

ஸ்கோர் : 158/6 (20 ஓவர்)

பேட்டிங் :

போபாரா: 14 (14) அவுட்

கோயல் : 0 (7) அவுட்

பதான் : 32 (17) அவுட்

சங்கக்கரா: 26 (24) அவுட்
யுவராஜ்: 38(28) அவுட்
ஜெயவர்த்தனா: 31 (19)
கோலி : 1 (5) அவுட்
சாவ்லா: 3 (6)

பவுலிங்:

திண்டா: 4- 0 -34 - 1

இ.சர்மா: 4 - 0-24 -1

ஹென்ரிகுயுஸ்: 4- 0 -32 -1

கங்குலி : 4 -0-24-2

சுக்லா: 2 - 0 - 22 -0

கெயில்: 1 - 0- 14 -0

கார்த்திக்: 1 -0 -7 -0
**********************************
//** தவிர்க்க முடியாத சில காரணங்களால் ஆட்டத்தின் இரண்டம் பாதியை என்னால் தொடர முடியவில்லை.

எனது முயற்சி குறித்த தங்களது கருத்துக்களை தயவு செய்து குறிபிடவும்)

//

ஆட்ட முடிவு: கொல்கத்தா வென்றது.

முதல் பாதியில் தடுமாறினாலும், யுவி, ஜெயா இருவரும் அணியை ஒரு மரியாதையான ஸ்கோருக்கு கொண்டு சென்றுள்ளனர்.
பந்து வீச்சாளர்களை சரியாக பயன்படுத்தி இருந்தால் மெக்குல்லம் இன்னும் ரன்னை குறைத்திருக்கலாம். அவருக்கு அனுபவம் போதவில்லை.
கொல்கத்தா அணி 20 ஓவர்களில் 159 ரன்கள் எடுக்க வேண்டும்.. என்ன நடக்கிறது சிறிது நேரத்தில் தொடரலாம்.

**************************
கடைசி ஓவர்:
திண்டா வீசுகிறார்:
முதல் பந்து: நான்கு ரன்கள்.. ஜெயவர்த்தனா அபாரம்.
இரண்டாவது பந்து: ஒரு சிக்சர்.
மூன்றாவது பந்து: இரண்டு ரன்கள்
நான்காவது பந்து: வொய்டு
நான்காவது பந்து: ஒரு ரன்
ஐந்தாவது பந்து: ஒரு ரன் (பை முறையில்)
கடைசி பந்து: ஒரு ரன்

*****************
19 வது ஓவர்:
ஹென்ரிகுயுஸ் தொடர்கிறார்.
முதல் பந்து: ரன் இல்லை.
இரண்டாவது பந்து: பவுண்டரி அடித்தார் ஜெயா
மூன்றாவது பந்து: ஒரு ரன்
நான்காவது பந்து : வொய்டு
நான்காவது பந்து : ரன் இல்லை.
ஐந்தாவது பந்து: ஒரு ரன்
கடைசி பந்து: ஒரு ரன்

*******
18 வது ஓவர்: திண்டா தொடர்கிறார்.
முதல் பந்து: ரன் இல்லை.
இரண்டாவது பந்து : கோலி ஆட்டமிழ்ந்தார். கீப்பர் கேட்ச்.
பஞ்சாப் தடுமாறுகிறது.
பியுஸ் சாவ்லா வந்துள்ளார்.
மூன்றாவது பந்து: ஒரு ரன்
நான்காவது பந்து: இரண்டு ரன்கள்
ஐந்தாவது பந்து: ரன் இல்லை.
கடைசி பந்து: ரன் இல்லை.

*******************
17 வது ஓவர்: கடைசியாக கார்த்திக் அழைக்கப்பட்டுள்ளார்.
முதல் பந்து: பவுண்டரி வீசினார் ஜெய..
இரண்டாவது பந்து: ரன் இல்லை.
மூன்றாவது பந்து: ஒரு ரன்
நான்காவது பந்து : ரன் இல்லை.
ஐந்தாவது பந்து: ஒரு ரன்
கடைசி பந்து: ஒரு ரன்

***********
16 வது ஓவர்: ஹென்ரிகுயுஸ் தொடர்கிறார் .
முதல் பந்து: ரன் இல்லை.
இரண்டாவது பந்து: ஒரு ரன்
மூன்றாவது பந்து: ஒரு பவுண்டரி விளாசினார் யுவி.
முரளி கார்த்திக்கை பயன்படுத்தாதது முட்டாள் தனம்.
நான்காவது பந்து: யுவராஜ் ஆட்டமிழ்ந்தார்.
கோலி வந்துள்ளார்.
ஐந்தாவது பந்து: ஒரு ரன் (ஜெய)
கடைசி பந்து: ரன் இல்லை.

*****************
15 வது ஓவர்:
சுக்லா தொடர்கிறார்:
முதல் பந்து: ரன் அவுட் ... சங்ககரா ரன் அவுட்டானார்.
ஜெயவர்த்தனா வந்துள்ளார்.
இரண்டாவது பந்து : வொய்டு
இரண்டாவது பந்து : ஒரு ரன் (ஜெய)
மூன்றாவது பந்து: ரன் இல்லை
நான்காவது பந்து: பவுண்டரி விளாசினார் யுவி.
ஐந்தாவது பந்து: அருமையான சிக்சர்
கடைசி பந்து: வொய்டு
கடைசி பந்து: ரன் இல்லை.

முரளி கார்த்திக் பந்து வீச அழைக்க பட வில்லை. மெக்குல்லம் மோசமான தலைமை.

***********
14 வது ஓவர் : சர்மா மீண்டும் வீச வந்துள்ளார். அவரின் கடைசி ஓவர்.
முதல் பந்து: இரண்டு ரன்கள்
இரண்டாவது பந்து: ரன் இல்லை.
மூன்றாவது பந்து: ரன் இல்லை.
நான்காவது பந்து: ரன் இல்லை.
ஐந்தாவது பந்து : ரன் இல்லை.
கடைசி பந்து: ஒரு ரன் மட்டும். சிறப்பான ஓவர்
*******************
13 வது ஓவர்: கங்குலி தொடர்கிறார்
முதல் பந்து: ஒரு ரன் (சங்ககரா)
இரண்டாவது பந்து: ஒரு ரன் (யுவராஜ்)
மூன்றாவது பந்து: ஒரு ரன்
*இந்த ஜோடி இப்பொழுது 50 ரன்கலை கூட்டாக எடுத்துள்ளது.
நான்காவது பந்து: ஒரு ரன்
ஐந்தாவது பந்து: ஒரு ரன்
* அணி எண்ணிக்கை 100
கடைசி பந்து: ஒரு ரன்.
கங்குலி பந்து வீச்சு முடிவடைகிறது.. நல்ல பந்து வீச்சு.

******************
12 வது ஓவர்: பந்து வீச்சில் மாற்றம். கெயில் வீசுகிறார்.
முதல் பந்து : 5 வொய்டுகள், அடுத்த பந்து வொய்டு.
முதல் பந்து: இரண்டு ரன்கள்.
இரண்டாவது பந்து : மீண்டும் ஒரு வொய்டு, மோசமான பந்து வீச்சு.
இரண்டாவது பந்து: ஒரு ரன்
மூன்றாவது பந்து: ஒரு ரன்
நான்காவது பந்து : ஒரு ரன்
ஐந்தாவது பந்து ஒரு ரன்
கடைசி பந்து : ஒரு ரன்

******************

11 வது ஓவர்: கங்குலி தொடர்கிறார்.
முதல் பந்து: பவுண்டரி விளாசினார் சங்கக்கரா.
இரண்டாவது பந்து: இரண்டு ரன்கள்.
மூன்றாவது பந்து: ஒரு ரன்
நான்காவது பந்து : யுவராஜ் சிக்சர் அடித்தார்.. ரன் விகிதம் அதிகமாகிறது
ஐந்தாவது பந்து: ரன் இல்லை.
கடைசி பந்து : ஒரு ரன் ..

****************
நல்ல செய்தி: தூறல் நின்னு போச்சு. ஆட்டம் தொடர்கிறது.
150 ரன்களுக்கு மேல் எடுத்தால் தான் வெற்றி பெற முடியும் என்ற நிலையில் இந்த இரு ஆட்டக்காரர்களின் கையில் தான் ஆட்டமே இருக்கிறது எனலாம்.

******************

*********************
விறுவிறுப்பாக சென்று கொண்டிருந்த போட்டியில் ஒரு மழை குறுக்கீடு. மைதானம் மூடப்படுகிறது. ஆனாலும் இது லேசான தூறல் தான் என தெரிகிறது. ஆட்டம் விரைவில் தொடரும் என நம்புவோம்.
****************
அதிர்ரடியாக தொடங்கிய பஞ்சாப் அணியின் போக்கை தனது ஒரே ஓவரில் தம் பக்கம் இழுத்து வந்தார் கங்குலி. அவரின் திறமை பற்றி எழுந்த விமர்சனங்களுக்கு பந்து வீச்சில் பதில் சொல்லி விட்டார். ஆட்டம் தற்போதைய நிலையில் சாருக்கானின் அணிப்பக்கம் உள்ளது.

*************
பத்தாவது ஓவர்: பந்து வீச்சில் மாற்றம். சுக்லா வீசுகிறார்.
முதல் பந்தில் ஒரு ரன்.
இரண்டாவது பந்தில் ஒரு ரன். கேட்ச் பிடிக்கப்பட்டது. ஆனால் கடைசி நொடியில் தவற விட்டார். பிரித்தி சிந்தாவுக்கு உயிர் பொய் வந்திருக்க வேண்டும்.
மூன்றாவது பந்தில் 2 ரன்கள்.
நான்காவது பந்தில் ரன் இல்லை.
ஐந்தாவது பந்து பவுண்டரி அடித்தார் சங்கக்கரா
கடைசி பந்து ஒரு ரன்.

************
ஒன்பதாவது ஓவர் சந்தேகமில்லாமல் நமது தல கங்குலி தொடர்கிறார். முதல் மூன்று பந்துகள் ரன் இல்லை.
கங்குலி ஆட்டத்தின் போக்கையே மாற்றி விட்டார்.
நான்காவது பந்தில் ஒரு ரன் மட்டுமே. ஐந்தாவது பந்தில் மேலும் ஒரு ரன். கடைசி பந்தில் ரன் இல்லை. சிறப்பான ஓவர்.
***********
எட்டாவது ஓவர் ஹென்றிகியுஸ் தொடர்கிறார். முதல் மூன்று பந்துகளில் ஒரு ரன் மட்டுமே. நான்காவது பந்தில் யுவராஜ் ஒரு பவுண்டரி விளாசினார். ஐந்தாவது பந்தில் மீண்டும் ஒரு ரன். கடைசி பந்தில் ரன் இல்லை.
***************
ஏழாவது ஓவர் : பந்து வீச்சில் இன்னொரு மாற்றம் கங்குலி வீசுகிறார். முதல் பந்தில் ஒரு ரன் மட்டுமே (போபாரா). அபாரம் கங்குலி விக்கெட் வீழ்த்தினார். முரளி கார்த்திக்கிடம் கேட்ச் கொடுத்து ஆட்டம் இழஅந்தார் பதான். முக்கியமான விக்கெட்.
சங்கக்கரா வந்துள்ளார். முதல் பந்தில் ஒரு ரன். அடுத்த பந்து போபாரா ஆட்டமிழ்ந்தார். கீப்பர் கேட்ச். கங்குலி அபாரம். அபாரம்.

புது ஆட்டக்காரர் யுவராஜ். அடுத்த இரு பந்துகளில் ரன் இல்லை. அபராமான பந்து வீச்சு.

*************
ஆறாவது ஓவர்: பந்து வீச்சில் மாற்றம் ஹென்ரிகுயுஸ் வீசுகிறார். முதல் மூன்று பந்துகளில் இரண்டு ரன்கள். நான்காவது பந்தில் மேலும் ஒரு பவுண்டரியை விளாசினார் பதான். அவரது எண்ணிக்கை இப்பொழுது 28. இறுதி பந்தில் மேலும் ஒரு பவுண்டரி.
***************
ஐந்தாவது ஓவரின் இரண்டாவது பந்தில் ஒரு சிக்சர், நான்காவது பந்தில் ஒரு பவுண்டரி பதான் விளாசினார். அணி எண்ணிக்கை வேகமாக உயர்கிறது. ஓவர் முடிவில் மேலும் 3 ரன்கள் (2,1). பஞ்சாப் அணிக்கு பலமான ஓவர்.
***********
நான்காவது ஓவர் திண்டா தொடர்கிறார். முதல் பந்து ஒரு ரன் (போபாரா). இரண்டாவது பந்தில் ரன் இல்லை. மூன்றாவது பந்தில் மேலும் ஒரு பவுண்டரி (பதான்). நான்காவது பந்தில் ஒரு ரன். ஐந்தாவது பந்தில் ரன் இல்லை. கடசி பந்தில் மேலும் ஒரு ரன். 4 ஓவர் முடிவில் 22 ரன்கள்.
**********************
மூன்றாவது ஓவர் சர்மா தொடர்கிறார். கோயல் எதிர் கொள்கிறார். முதல் பந்து ரன் இல்லை. இரண்டாவது பந்தில் ஸ்லிப் திசையில் கேட்ச் கொடுத்து ஆட்டமிழக்கிறார்..
பதான் புதிதாக களமிறங்கியுள்ளார்.
ஓவரின் மூன்றாவது பந்தை பவுண்டரிக்கு அனுப்பினார். நாலாவது பந்தில் ரன் இல்லை.. ஐந்தாவது மற்றும் கடைசி பந்தில் தலா ஒரு ரன்..

************
இரண்டாவது ஒவரை திண்டா வீசுகிறார்.. முதல் நான்கு பந்து ரன் எதுவும் இல்லை. ஐந்தாவது பந்தில் ஒரு நான்கு ரன்களை அடித்தார் போபாரா.. அணியில் முதல் பவுண்டரி..ஆறாவது பந்தில் மேலும் ஒரு பவுண்டரி.. அபார ஆட்டம்.
*************
முதல் ஓவர் முடிவில் பஞ்சாப் அணி 1 ரன் மட்டுமே.. விக்கெட் இல்லை.. அருமையான ஓவர்..

0.2 இ.சர்மா கோயலுக்கு வீசுகிறார். ரன் இல்லை.
0.1. இ.சர்மா போபாரா வுக்கு வீசுகிறார். 1 ரன்

நடுவர்கள் மைதானத்துக்குள் வந்து விட்டார்கள். ஆட்டம் தொடங்க உள்ளது.
************************************
கொல்கட்டா அணி பூவா தலையா வென்று முதலில் பீல்டிங் செய்ய தீர்மானித்துள்ளது.

அணி விபரம் : பாஞ்சாப் அணி சென்ற போட்டியில் ஆடிய அதே அணி..

கொல்கட்டா அணியில் அகர்கருக்கு பதிலாக Yesphal Singh சேர்க்கப்பட்டுள்ளார்.
***********

இரு அணிகளுமே வெற்றியை எதிர்பார்த்து மோதும் இப்போட்டியில் பரபரப்புக்கு பஞ்சம் இருக்காது. நேற்று இரவு டர்பனில் மழை பெய்ததால், இப்போட்டியிலும் மழைக் குறுக்கீடுகள் எதிர்ப்பார்க்கடுகின்றன. முந்தைய போட்டியில் பஞ்சாப் அணி டேல்லியிடமும், கொல்கத்தா அணி டெக்கான் அணியிடமும் தோற்றன.