அச்சம் தவிர்...

ஒவ்வொரு குறும்பிலும்,
தன் தாய்க்கு
அவளது பால்யத்தை
நினைவூட்டுகிறது
குழந்தை.

****

கனவில் விளையாடும்
தன் தேவதை தோழிகளை
பிரிய மனமில்லாமல்,
தினமும் காலையில் 
அழுகையோடு விழிக்கிறது குழந்தை!

****

திட்டிய அப்பாவை,
ரெட் ரேஞ்சர்சிடம்
சொல்லி விடலாமென
விசும்பும் தாயை
தேற்றுகிறது குழந்தை!

****

"பூச்சாண்டியிடம்
பிடித்து கொடுத்துடுவேன்"என்று
மிரட்டினாள் தாய்.

"கொடுத்துக்கோ!
எனக்கொன்னும் பயமில்லை"
என்றது குழந்தை!

அடுத்து
என்ன சொல்லி
மிரட்டுவது என தெரியாமல்
விழிக்கிறாள்,
தன் பால்யத்தில்
பூச்சாண்டிக்கு பயந்த தாய்!

****
பொம்மைகளின் மொழியில்
புலமையோடு பிறக்கும் குழந்தை,
புதுமொழி கற்கையில்
இழக்குது புலமை.

ஐந்தாண்டுக்கொரு முறையேனும்,
கும்பிட்ட கரங்களோடு தலைவர்களும்;
வாங்கிய கடனெல்லாம் வட்டியோடு தள்ளுபடியும்;
ஜனவரியில் பிரிதொரு விடுமுறையும்,
அதில் சிறப்பு நிகழ்ச்சிகளும், திரைப்படமும்;
ஓட்டுக்கு ஐந்நூறும், ஓசியில் பிரியாணியும்;
இலவச  டிவியும், இன்ன பிற சலுகைகளும்
குடியரசு இல்லாமல் சாத்தியமில்லை
குடியரசை போற்றுவோம்!!!

கலாச்சாரங்கள் இணையும்
கலைப்பயணமாய், பேருந்து ஒன்றில்
இன்ப சுற்றுலா சென்றன
தசாவதார பாத்திரங்கள்.

 மேல்நாடு வாழும்  மகன் ரோஸ்மில்க்
அனுப்புவானென அரற்றிவந்தார்  பாட்டி;
புஜபலம் காட்டி, கட்டி புரண்டனர்
பிளட்சரும், நரஹாசியும்;

தன் இருக்கை தனக்கே சொந்தமென,
அராஜகம் செய்தார் அவதார்சிங்;
தனக்கென தனியிருக்கை வேண்டி
ஆர்ப்பாட்டம் செய்தார் பல்ராம் நாயுடு;

ஆடு புலி ஆட்டம் ஆடி வந்தனர்
ரங்கராஜன் நம்பியும், பூவராகனும்;
கோவிந்தும், கலிஃபுல்லாவும் குனிந்திருக்க
லாவகமாய் பச்சக்குதிர தாண்டினார் புஷ்;

இப்படியாய் ஆடிக்களைத்து, அடுத்தவர்
தோளிலும் மடியிளுமாய் கண்ணயர்ந்தனர் சிலர்;
குரோதம் குறைந்து, அணைத்த வாக்கில்
தூங்கினர் பிளட்சரும் நரஹாசியும்;

அருகருகே அமர்ந்த போதும்
கடைசிவரை தூங்கவுமில்லை,
ஏனோ தோள் சாயவுமில்லை
ரங்கராஜனும், பூவராகனும்.

எட்ட முடியா எல்லைகள் தேடி
தொலைவுகள் கடக்கும் பயணம்;
நிச்சயமாய் இன்றே இல்லையெனினும்
நிதர்சனமாய் உடன்வரும் மரணம்.

அக்கரை சேர்வது சுலபமில்லை
ஆனாலும் ஆசைகளுக்கு அளவில்லை;
முடிவில்லா பந்தயத்தில்
முந்தி செல்பவர்கள் முதலில் செல்வதில்லை.

தேடலோன்றே நோக்கம், அதில்
ஊடலும், கூடலும் சொச்சம்;
ஊன் தேடி பயணம், அதில்
உயிர் என்பது துச்சம்.

அர்த்தமற்ற பயணத்தில்
அற்பமாய் மரணிக்கிறோம்;
நிலையற்ற வாழ்க்கை ஓட்டத்தில்,
நெடுஞ்சாலை கடக்கும் எறும்புகள்தாம்  நாமும்.